8th Schedule-a Mizo tawng telh tha ti

Mizo Literature and Language Teachers’ Academy (MLLTA) chuan thuchhuah siamin, 8th Schedule-a Mizo tawng telh tura hmalakna an thlawp thu an tarlang.

MLLTA chuan, “Mizoram Legislative Assembly pakuana, budget session neih mekah, March 9, 2026-a Education Minister Dr. Vanlalthlana official resolution putluh ‘Eighth Schedule to the Constitution of India-ah Mizo tawng hi telh tura hma lak ni rawh se’ tih lungrual taka pass a ni hi lawmawm kan ti takzet,” an ti.

Party hrang hrang aiawha thusawitute pawhin, India Constitution Eighth Schedule-a Mizo tawng telh ve a pawimawh zia hria a, resolution an thlawp vek hian a hnam anga kan inlungrualna pawh a tar lang hle tih tarlangin MLLTA chuan, 8th Schedule-a Mizo tawng telhve tura dilna leh ngenna awm mek pawh, he resolution hian chak lehzuala a nawr theih ngei an beisei.

MLLTA chuan January 23, 2026-a Mizoram Education Reforms Committee (MERC) thukhawmin an rawtna, Mizoram chhung English Medium School zawng zawngah,
kar khatah nikhat tal ‘Mahni Tawng Hman Ni’ (Home Language Day) siam a rawt pawh hi lawmawm an ti a, he rawtna pawh hi sorkarin a takin kalpui ngei se an duh.