Aug 05, 2026
Wednesday
Education Minister Dr. Vanlalthlana chuan pawl 10 zirlai H Ramdinpuii (15) d/o H Lalawmpuia, Mualthuam North thih chungchangah a social media account kaltlangin a chhungte a tawrhpui thu a tarlang.
Dr. Vanlalthlana chuan, “Mualthuam North tleirawl duhawm tak leh hma hun eng tak H. Ramdinpuii kum 15 d/o H. Lalawmpuia chunga thil thleng chungchang ka lo hriat khan min barakhaih hle mai. Zirlai duhawm, pawl 10 zir mek, mi dang pawisawi lo leh chhungte inngahna la ni chho mai turin mi kut tuar ni ngeia hriat leh rawng taka a tual thihna hi a pawi ka tiin Ramdinpuii chhungte zawng zawng thinlung takin ka tawrhpui a ni. He thil duhawm loh tak titu hi man chhuah a nih ngei theih nan leh a phu tawk ang ngeia hremna na tak a chungah lek a nih theih nan Mizoram Sawrkar chuan theihtawp a chhuah dawn a ni,” a ti.
Education Minister chuan, “Ramdinpuii’n a kalsan tak a chhungte zawng zawng chungah Pathian thlamuanna lo awm se la, an lusunnate Lalpan lo chhawk zel se, Zoram mipuite pawhin an chhungkaw tan thlamuanna i dilsak theuh ang u,” tiin Zoram mipuite a sawm.
