A tul huna ‘aih’ ti ngam turin chah

Upa Lalnunpuia Hrahsel chuan MES rualte chu hun bi vawng dik mi, a mamawhtu tana hun bi nei lo va thawk thei mi ni turte, In zir peih mi, thiamna chhuang si lo mi turte, ngaih dan leh pawm dan mumal tak nei, mite ngaihdan tawmpui thiam si mi ni turin a chah a, an hna zahawm tak chu Lalpa rawngbawl nana hmang turin a chah bawk.

UPA LALNUNPUIA HRAHSEL-IN TUL HUNAH ‘AIH’ TI NGAM TURIN CHAH, HOME MINISTER THUSAWI THA A TIH THU A SAWI…

Thuhriltu lar, hla phuah thiam Upa Lalnunpuia Hrahsel in Mizoram Engineering Service (MES) tling tharte chu eirukna leh hlemhletna thil tih theihna tur a awm hunah fing leh huaisen takin ‘aih’ tingam turin a chah.

LPS Vision Production-in nizan (26.6.2026) a MES tling tharte lawmpuina inkhawm an buatsaiha fuihna thuchah sawitu Upa Lalnunpuia Hrahsel chuan engineer rualte chu a tul hunah ‘aih’ ti ngam turin a fuih a, dinhmun pawimawh tak, thutlukna lian tham siam fotu zingah an tel dawn avangin Pathian duh loh zawng leh ram tana chhiatna tur a thlen dawn chuan huai taka ‘aih’ tingam turin a chah a ni.

Upa Lalnunpuia chuan hmanni deuhah khan Home Minsiter K.Sapdanga’n a thu sawinaah, ‘a tul hunah chuan aih tih ngam a tul hun a awm thin’ tih a sawi Vanglaini News paper-ah a lo chhiar thu sawiin, “Tha ka ti hle,” tiin ramin a tawrh dawn emaw, eirukna leh hlemhletna thil tih theihna tur a awm phawt chuan fing leh huaisen takin ‘aih’ tingam turin officer rualte chu a chah a ni.

MES tling tharte lawmpuina inkhawm hi Zarkawt Community Hall, Aizawl ah neih a ni a, LPS neitute zinga mi Upa Lalrochuanga Pachuau in hunserh a hmang a, Department of Fisheries leh Irrigation & Water Resources Department Secretary Lalrothanga, MES leh Mizoram Engineering Service Association President Lalrinzuala Ralte, MES ten thu an sawi a, MES tling thar aiawhin Zoremsanga, MES in thu a sawi bakah zirlai ti tha zualte kawmna hun hman tel a ni bawk.

MPSC-in MES (Combined) Examination 2025 a buatsaih result chu kumin May thla khan tih chhuah a ni a, MES atan mi 38 lak thar an ni a. Public Works Department-a thawk tur mi 16, Power & Electricity Department-a thawk tur mi 15 leh Public Health Engineering Department-a thawk tur mi 7 te an ni.