ADB loan an pawm tawh

Health Minister Lalrinpuii chuan vawiin (16.12.2025) chhun khan a office-ah thuthar thehdarhtute kawmin, Mizoram Universal Health Care Scheme (MUHCS) atana Asian Development Bank (ADB) atanga loan US dollar million 108 (vbc. 980) vel puk tur chu pawmfel a nih tawh thu a sawi.

Lalrinpuii chuan sawrkar hmasa khan health care atan ADB atanga loan lak tumin hma nasa takin an lo la tawh tih sawiin, “Central Sawrkar pawhin he proposal – ‘Improvement of Mizoram State Health Care Scheme by Enhancing the Corpus Fund’ tih chu pawmin ADB hnenah min thehluh sak hman nghe nghe. Amaherawhchu, hemi stage paltlang hnu hian hmalakna tur tam tak awmin heng hma lak zelnaah hian Covid hrileng vang leh chhan dangte vangin harsatna hrang hrang tawh a ni a, thla 18 chhunga loan tihfel tura Ministry of Finance-in a tih chu hun tiam chhungin bawhzui fel theih a ni ta lo,” a ti.

He project hi approval revalidate turin theihtawp chhuah a nih thu sawiin Health Minister chuan, “Health indicator hrang hrang tihlawhtling tura min tih chu kan tih chho ta zel a, Universal Health Care Scheme kan han kalpui khan a hlawm em em a ni. Chuvangin, ADB leh Ministry of Finance-te duh danin, a project hming ah pawh ‘SupporYng Public Healthcare System Strengthening to Achieve Universal Health Care for Mizoram’ tih a lo ni ta,” tiin, an tih tur zawng zawng kan tihfel zawh hnuah, October 23, 2025 khan loan negotiation neih niin, ADB Board chuan December 5, 2025 khan loan chu a lo approve thu a sawi.

Health Minister sawi danin, ADB atanga loan puk tur hi US dollars million 108 a ni a, chu chu tuna market rate ah chuan cheng vbc. 980 vel a tluk a ni. He loan amount atanga 90% hi Central Sawrkar tum tur a ni a, 10% (cheng vbc. 90) vel bawr chauh hi kum 15 chhunga Mizoram Sawrkarin a rulh ve tur a ni. He loan hi ADB in approve tawh mah se, loan agreement la sign a ni loa, Ministry of Finance, Department of Economic Affairs-in a loan agreement sign tur ni a ruat hunah loan hi sign tur a ni.

Loan hi sign a nih velah Disbursement Linked Indicator (DLI) an neih sa hmangin cheng vbc. 21 el chu thla 1 chhunga an rawn release hman beisei a ni. Loan amount atanga zaa sawmkua (90%) lai Government of India in a rulh dawn avangin MUHCS atana State Sawrkar sum sen chu nasa takin a tlahniam dawn a ni.