News

Finance Department, Government of Mizoram chuan a hnuaia tarlan ang hian Mizoram State Healthcare Scheme changtlung zawka kalpuina tur Asian Development Bank (ADB) loan sign a ni chungchangah a hnuaia tarlan ang hian thuchhuah an siam.

Mizoram Sawrkarin Mizoram State Healthcare Scheme changtlung zawk kan neih theihna turin ADB atanga loan assistance hmuh tuma rei tak hma a lo lak tawh chu tih puitlin niin loan agreement sign fel a ni ta. Supporting Public Health Care System Strengthening To Achieve Universal Health Care For Mizoram atana ADB loan lakna tur chu kumin January 23 khan ADB Headquarters, Manila-ah sign a ni ta a, India aiawhin Baldeo Purusartha, Joint Secretary, Department of Economic Affairs, Ministry of Finance chuan a sign a, ADB aiawhin Mio Oka, Country Director, Director, India Resident Mission chuan signin, Mizoram Sawrkar aiawhin Ramchuana, Finance Secretary chuan a hmuna kal loin e-mode in a sign ve bawk a, Loan ID L-4718 pek a ni.

Hemi atan a Mizoram Sawrkarin loan project a siam “Improvement of Mizoram State Health Care Scheme by enhancing the Corpus Fund” tih chu May 31, 2022 khan Ministry of Finance chuan a lo pawm tawh na a, harsatna hrang hrang avangin approve theih lohin a awm a, tun sawrkar hian thar thawh lehin “Supporting Public Healthcare System Strengthening to Achieve Universal Health care for Mizoram” tiha thlak a ni.

Hemi hnu hian tih tur hrang hrangte tih a ni a, Ministry of Finance lama harsatna kan tawh loh nan Chief Minister Lalduhoma leh Health Minister Lalrinpuii te chuan Union Finance Minister chu hmaichhan ngeia sawipuiin, D.O. letter te an pe tel nghal bawk a. Department of Expenditure, Ministry of Finance a zohnahthlak Secretary awm thar – Vumlunmang Vualnam, IAS pawh hmai chhan ngeia hmu in, theihtawp min chhuahpui turin ngen a ni bawk.Tin, Finance Department lama kan hotute pawhin nasa taka bawhzuiin, Central Ministry-ah pawh zuk kal chilha nawr a ni.

Tichuan, rei tak buaipui a nih hnuah October 23, 2025 khan loan negotiation neih niin ADB Board chuan December 5, 2025 khan loan chu a lo approve ta a ni. Loan approve a nih hnu hian thlasik chawlhin a zui avangin beisei anga hmaah loan agreement hi sign a ni lo a, January ni 23 khan hybrid mode (a tak leh video mode tangkawp) in sign a ni ta chauh a ni.

Mizoram Universal Healthcare atana ADB atanga loan hmuh zat (loan component) hi USD 108 million niin,India pawisa chuan cheng vbc. 800 vel a ni. ADB loan pumpui hi Ministry of Finance hnuaia Externally Aided Projects hnuaia hmuh a nih avangin Government of India-in a rulh tur a ni. Government of India, Ministry of Finance in a rulhna tur interest rate hi SOFR (Secured Overnight Financing Rate) tih niin 3.6% per annum vel bawr ni tura chhût a ni a. Central Sawrkar hian loan pumpui atanga 90% hi grant angin Mizoram a pe ang a, 10% (cheng vbc. 80) hi Mizoram Sawrkar hnenah loan anga Mizoramin a rulh ve turin a puktir chhawng dawn chauh zawk a ni. Mizoram sawrkarin he 10% a rulh ve tur chin a rulhna tur interest rate hi chu Central Sawrkara Ministry of Finance in a la ruahman tur a ni a, State Development loan (OMB) ang vel tura beisei niin 7-8% interest vel tur a ni ang.

MUHCS atana ADB atanga sum puk hi thil danga hman tur a ni lo a, MUHCS Corpus Fund atan chauha hman tur a ni. Loan amount atanga zaa sawmkua (90%) lai Government of India in a rulh dawn avangin MUHCS atana State Sawrkar sum sen chu nasa takin a tlahniam dawn a ni.

Tin, he loan hi a lo hlawhtlin theihna tura theihtawp min chhuahpui tu, Ministry of Finance, Department of Expenditure-a Secretary atana kan zohnahthlak awm thar, Vumlunmang Vualnam chungah te, Department of Economic Affairs-a Joint Secretary Juhi Mukherjee, Serchhip DC hlui, a bul atanga a tawp thlenga theih tawp min chhuahpuitu chungah te, Ministry-a thawktu zawng zawng te, ADB lam atanga hemi buaipuitu Dr. Nishant Jain leh a team-te bakah, Mizoram lam tih tur hrang hrangte tha taka lo ti zel tu, Mizoram State Healthcare Society chungah Mizoram Sawrkar, Finance Department chuan lawmthu a sawi tak meuh meuh a ni.