Airport cheithat PIL ngaihtuah a ni

Ni 17.2.2026 khan Gauhati High Court Chief Justice Ashutosh Kumar leh Justice Michael Zothankhuma ten Lengpui Airport cheithat PIL case chungchang an ngaihtuah leh.

Thulaknain a tarlan danin, contractor pakhat zawk Zoramchhana ukil JC Lalnunsanga chu court hmasaah an hnathawh tawh chin affidavit thehlut tura tih a nih angin court-ah hian affidavit a thehlut a ni.

Affidavit tarlan a nih dan chuan, Zoramchhana hian civil work, a chhung cheite a khawih a, ni 3.3.2022 a sawrkar nena an inremna bakah ni 7.11.2022 khan inremna siam belhin a hna khawih zawng zawng chu cheng vbc. 19.56 a ni.

Court thupek anga a hna endiktuten a hna thawh chin ni 1.12.2023 a an endik ang chuan 96 % zo tawh tih court ah an thlen thu an sawi.

Hemi mai baka court order ni 3.11.2025 a Kamlova leh Zoramchhana hnathawh chin a endiktu sawrkar in court-a hriattir a nih danin ni 1.11.2025 thlenga an hna thawh atanga la bang a sawite chu –

Kamlova hna lamah chuan ⁠ check-in area (540sqm) chu siam that a, inthiarna thar siam te a la ngai. Hengte hi check in area chu a hmun thar a sawn a nih hunah chiah siam theih a ni dawn tih court ah an thlen.

Zoramchhana hna lamah chuan a chung tur siam a la ngai. Order hi company-ah thlen tawh niin an design te pawm a nih hnuah a chung khuh hi tan a ni ang tih court ah an thlen.

Zoramchhana chuan a affidavit-ah hian PWD-te chuan Pooja Steel Corporation chu a chung siam tur hian an thlang. A hmanraw hman tur pawh company-in ni 1.8.2024 a an dil lai lawk cheng nuai 56 chu ni 8.8.2024 khan a pek tawh thu a sawi a, hna hi 98 % zo tawh angin a in sawi.

Contractor-te ukil JC Lalnunsanga hian a affidavit-ah chuan, Lengpui Airport-a hna thawh tha lo ang a lan chhan chu airport dangte nen kan tehkhin thin avang a nih thu a sawi. Lengpui Airport cheinna project atan hian cheng vbc. 39 bawr (Kamlova hna vbc. 19.59 leh Zoramchhana hna vbc. 19.56) vel chiah sanction a nih laiin Shillong (Meghalaya) a Umroi Airport zauh nan cheng vbc. 600 lai sanction a ni a, cheng vbc. 2,000 lai mai Lokpriya Gopinath Bordoloi International Airport chei that leh hna zawh nan sanction a nih thu a sawi.

PIL thehluttu Vanramchhuangi) ukil Joseph Lalchhanhima Renthlei chuan court-ah hun a dil a, hna te enchiana, a tul anga hna la thawh zawh lohte thlalak court-ah a thehluh phalsak a ni.

Thubuai hi March 5, 2026 ah ngaihtuah a ni leh ang.