Aizawl khawpui boruak a chhe sawt

Mizoram Pollution Control Board (MPCB) chuan thuchhuah siamin, halpuah leh halmawi hal hma leh hal hnuah Aizawl khawpui boruak a inthlauh thu leh Aizawl khawpui boruak a chhiat telh telh thu an tarlang.

Boruak hrisel dan an enfiahna khawlpui ber Sikulpuikawna real time data hmuh theihna chu Central lamah khawl a chian loh avangin zanlai data kan hre thei ta lo tih tarlangin MPCB chuan, “A pawi takzet a ni. A tuk January 2 chhun dar 12:00 vel khan Aizawl AQI chu 80 a ni a, hei hi halpuah hal ațanga darkar 36 hnu a ni. Halpuah hal hma ni 31.12.2025 tlai dar 4:00-ah chuan AQI chu 38 a ni a, heta tanga a lan danin AQI hi a let 2 chuang (210%) hretin a pung a ni,” an ti.

MPCB chuan data ațanga a landanin boruaka bawlhhlawh sin te bik, particulate matter 2.5 micron, (PM2.5) hi kan khawpuiah a pung chho nasa hle tih tarlangin, “December thla bikah hian kum 2024 ah PM2.5 hi chawhrualin 19 µg/m³ chauh a nih laiin kum 2025 ah chuan 38 µg/m³ a kai chho tawh a, a letin a pung tihna ni. PM2.5 hi chuapa lut awlsam, paih chhuah leh theih si loa tang ta tlat thin a nih avangin a pawi zual. Kumtluana boruak dinhmun thlirin Aizawl khawpui boruak hi a kum telin a letin a bawlhhlawh tial tial a ni tih a tilang. Boruak tibawlhhlawh thei thil hal lo tura mimal, pawl leh sawrkar pawhin tan kan lak deuh deuh a pawimawh hle a ni,” tiin kan hriselna hi kan thupui ber ni theuh se a duhawm thu an tarlang.