Aizawl khawpui kawng siam tan

Ruahmanna an lo siam lawk tawh angin nizan (30.10.2025) atang khan Aizawl khawpui kawng siamthat (re surfacing) tan a ni a, PWD Minister Vanlalhlana chuan kawng siam hna an thawh hi a hmunah a enfiah.

Vanlalhlana chuan ZPM-in election-ah khan manifesto-ah kawng siam an neih thu sawiin, ‘Chumia hmalakna kal zelah chuan Aizawl khawpui hi a hmasaah chuan paver kal theihna chinah hian kawng tha tak siam hmasak kan tum a, wheelbarrow kal theihna chin pawh siam vek kan tum. Tunhma deuh atang khan ‘October 30-ah bul kan tan chat ang’ kan ti thin. Chutiang tur chuan contractor pawh ni 30-a bul tan chat thei turin an rawn inruahman a, zaninah hian bul kan tan ta a ni. Tunah hian PWD CE, SE, EE leh PWD staff te, a contractor-te kan awm a, eng angin nge bul an tan tih kan en ho. Kawng tha kan nei tur a ni tih hi kan duh dan a ni. Keini official-te mai bakah Local Council te, NGO te pawh telin, a chhah lam te, temperature dik tak a ni em tih te leh a quality-te pawh hi engtik lai pawhin kan check dawn,’ a ti.

Kawng țha kan neihna turin tunhma ang lo deuh hlekin an kalpui dawn PWD Minister chuan, ‘Quality-ah hian mipui pawh kan strict em em dawn a ni tihte kan inhriattir thar leh. Zanina hma an han lak chinah hian kan lawm viau a. Lungte pawh chang tha deuh hmang turin kan inhriattir a. PWD SE Office kawt atanga Ramhlun main road thleng hi zaninah hian zawh hman tur a ni. Zantin an thawk ang a, mipuite paw’n harsatna kan tawk a nih pawhin lo dawh hrâm hrâm ila, kawng țha kan neihna tur a nih chuan thawktute pawh lo tawiawm ang u,’ tiin a quality-ah duhtui turin mipui a sawm.

He hunah hian contractor Pratik Godha, Nidhi Creative Infrastructure Pvt. Ltd. chuan he hna thawk tura an inbuatsaihna leh hmalak an tum dan a sawi a. Mizoram PWD ațangin Robin Lalrinawma, CE leh Lalrinngheta, Central Circle SE bakah Ramhlun Venglai Local Council Chairman Pu Lalremsanga pawhin thu an sawi a ni.