News

Aizawl Mihlun Thlahte chuan vawiin (20.6.2026) hian Inkhawmpui Lian (High Council) Aijal Club-ah an hmang a, Lok Sabha MP Richard Vanlalhmangaiha’n a hmanpui.

Lok Sabha MP chuan Aizawl Mihlun Thlahte pawl a ding chu lawmawm a tih thu leh thlahtute avanga he pawl zahawm taka a tel ve thei chu lawmawm a tih thu a sawi a, “Aizawl khawpui hian hmangaihtu leh neitu thinlung pu mi a mamawh,” tiin Aizawl hi rel lo luh hnuah khualzin miten an tlawh nasat lehzual avangin; Aizawla chengte kawng engkima inbuatsaiha, hmasawnna lam hawia ngaihtuahna seng turin a sawm.

High Council hi an pawl Vice Chairman John Rotluangliana ex-minister chuan a kaihruai a, an General Secretary Vee Mathara hnen atangin pawl hmalakna chanchin a tarlang a, an member chatuan ram pan mi 31 te hriatrengna hun an hmang. An pawl Chairman K. Liantlinga Ex-MLA chuan thuchah a sawi. An member zinga ram hruaitu atana thlan thar Richard Vanlalhmangaiha M.P leh AMC Corporator Dr. Lalmalsawma Nghaka te chawimawina thuziak an hlan.

Agenda hrang hrang ngaihtuahin High Council rorelna an nei zui a, MJA General Headquarters kaihhruaiin kum 2026 – 2028 chhunga pawl hruaitu tur an thlang. Hruaitu atana an thlan chhuahte chu – V. Lalnunthara (Mathara), K. Liantlinga, Dr. Vanlalruata, John Rotluangliana, K. Vanlalnghaka leh Zochhuanmawiate an ni.

Aizawl Mihlun Thlahte hi kum 2017 June 21 khan V. Thanga In, Dawrpui-ah din a ni. Kum 1950 hmalama Aizawla inbengbel tawh, an tu leh faten an din a ni a, tun dinhmunah member 1,666 an nei mek.