Apr 22, 2026
Wednesday
Central YMA hnuaia ruihhlo dotu Central Anti-Drug Squad (CADS) leh Excise & Narcotics Department tangkawp chuan nimin (21.4.2026) khan ruihhlo thahnem tak an man.
Thudawn danin, Aizawlah heroin eng emaw zat rawn luhpui tum a awm tih hriat lawk a nih avangin, CADS leh Excise-te hian uluk takin an chang a ni. Tlaivar thaka an chan hnuah, nimin zing dar 4:00 vel khan Company Peng-ah an in man ta a ni.
He hmunah hian ruihhlo rawn kengtu Lalchungbika s/o Zinghmunthanga, Zokhawthar (Vanapa Section) mi ni a insawi hnen atangin heroin hawng 22 an man a ni.
He thil thleng chungchangah hian Central YMA Treasurer leh CADS Convener ni bawk H Duhkima chuan ruihhlovin kan ram a tuam nasat tawh zia sawiin, “Heroin hian nasa takin kan ram a tuam mek a, tuilian ang maiin min chim sang tial tial mai a ni. Mirethei leh hausa ban phakah ruihhlo zuartuten an vawrh darh chum chum a ni ber,” a ti.
CADS Convener chuan ruihhlo laka mipuite kan him nan tanrual a pawimawh zia sawiin, “Ruihhlo la ti ve lo te venhim a, a ti mek ruihhlo ngaite khuahkhirh tura Zoram hmangaihtute tanrual a va hun em. Chhung lam atanga min beitu doral bei tur hian midang tih tura dah lovin, kan theih tawk theuhin tha thlah lovin i do sauh sauh ang u,” tiin mipuite hnenah chhungkua leh khawtlang venhim kawngah nasa zawka ke pen turin a ngen.
