Aizawlah kidney transplant a tihve thei dawn ta

Health Minister Lalrinpuii chuan vawiin (16.12.2025) hian a office-ah press conference neiin, Aizawlah kal thlak (kidney transplant) a tihve theih dawn tak thu an sawi.

Lalrinpuii chuan tunhma atanga damlo inenkawlna atana Mizoram sum, phai lama a luanral tamna pawl tak chu kal thlak hi a nih thu sawiin, “Kan sawrkar doctor thiam tak takten ka hnenah – ‘kidney transplant thei turin kan thiamna in a tlin ve reng a nia’ tih min hrilh kha ka tan chuan chona nasa tak a ni. Mi rethei te te tana a tangkai dantur hriain theihtawpin hma kan la chho char char. Tunah chuan a hmawr kan bawk hnai ve ta. Kan lawm hle mai,” a ti.

A taka kidney transplant kalpui thei turin Civil Hospital, Aizawla an operational theatre-te pawh an buatsaih fel tawh tih sawiin Health Minister chuan, “Aizawl Smart City Ltd atangin Anaesthesia Work Staion bakah hmanraw tul ang ang min pek belh tawh a ni. Tin, Narayana Health – RN Tagore InternaHonal Institute of Cardiac Science, Kolkata a mi, Mizoten RN Tagore Hospital tia kan hriat lar nen khan nimin piah khan thawhdunna thluthlung – MoU kan sign ta. Kumthar – January atangin kan Nephrologist leh puitu dangten Tagore Hospital-ah training an zuk nei nghal ang a, training an neih zawh hunah chuan a takin Aizawlah kidney transplant kan ti ve thei dawn ta,” tiin mi rethei zawkte tan a lawmawm hlea an hriat thu a sawi.