AMC-in study team report an thlirho

Vawiin (07.08.2026) chawhma dar 11:00 khan Aizawl Mayor H. Lalremtluanga kaihhruaiin AMC Conference Hall-ah AMC subject hrang hrang zirchiang tura din, Study Team-te report thlirho a ni.

Meeting-ah hian Deputy Mayor, executive corporatorzawng zawng leh AMC officer-te an tel. Building permit, parking area, lei laih permit, streetlight, vending zone, hoarding & licensing, slaughter house, vawk vulh chungchang leh bawlhhlawh paih dan mumal leh hmasawnna tur chungchangah Study Team member secretary-te chuan an zirchian dan report leh rawtna neihte an sawifiah.

Member secretary-te’n an sawifiah zawh hian sawihoin, Executive Council Meeting-ah chhawpchhuah turte an siamfel nghal.

Meeting-ah hian Study Team-te rawtna chu AMC hna kalphung siamthatnate leh Aizawl mipuite tan service tha zawk kalpui theihna tur hrang hrangte a nih thu tarlan niin, Executive Council Meeting-in a passed hnuah hmalak nghal zung zung nise tiin an rel.

Aizawl Mayor chuan Study Team-te’n a hun taka report felfai leh tha tak an buatsaih avanga a lawmthu sawiin, an rawtnate chu AMC hmasawnna atan tangkai tak a nih dawn thu a sawi bawk.

ZPM kaihhruai AMC sorkar hian sorkarna an chelh hnu lawkah chak leh mipui tana tha zawka hna an thawh theihna atan AMC subject hrang hrang zirchiangtu tur Study Team 12 a din nghal a, anni hian ngawrh takin zirchian hna an thawk. Study Team tin hi executive corporator-te’n hoin, member secretary chu a concern officer-te an ni a, member-ah corporator leh AMC staff-te an tel.