AMC Playground-ah thil fel lo awmin hria

ZPM THalai chuan thuchhuah siamin vawiin (12.3.2026) hian Bawngkawn Brigade-a AMC Playground chu a hmunah an tlawh tih tarlangin, “Thil fel lo tam tak a awm ngeiin kan hria a, Rs 5,04,36,000/- hman ralna kan hmuh loh bakah MNF Party worker an duhsak zawng 18 hnena Aizawl țhalaite infiamna rotling tur an sem sawm hi kan dem hle,” an ti.

Vawiina Assembly Budget Session-ah Lunglei West bialtu T. Lalhlimpuia zawhna UD&PA Minister-in a chhannaah Bawngkawn West-a Brigade Field, AMC Playground lo nita-a sum senso zat chu Rs. 5,04,36,000 a ni thu tarlangin ZPM Thalai chuan, “A hmuna kan tlawhnaah cheng vbc. 5 chuang hman ralna tur kan hmu lo. RTI hmanga AMC-a zawhna min chhannaah erawh contractor 16 leh sum senral Rs. 4,20,87,000 a ni,” tiin AMC-in RTI hmanga chhana an pek rinhlelhawm an tih thu an tarlang.

ZPM Thalai tarlan danin, AMC Playground hi a nih tur ang a nih loh zia an finfiah. March 21, 2022-a hawn tak, Lengpui MSSC Sports Complex-a Synthetic Astroturf Football Ground cheng nuai 500 lakh senga sak nen chuan tehkhin chi pawh a ni lo hial. Lengpui khelmual siamna aia Rs. 46,000/- a an seng tam zawk chungin artificial turf pawh phah loh, zim zawk bawk si, inkhelhna tlak loha an chhuah.

He khelmual hi a nihna angin tih puitling ni se, Mizo ṭhalaite, a bikin Aizawl ṭhalaite chhawr tur infiamna hmunhma pawimawh tak a ni a, MNF kaihhruai AMC-in political party worker inhlawhna mai maia an hmang leh, hna ṭha thawh aia mi 18 hnena an sem sawm hi Aizawl ṭhalaite hmuhsitnaah an ngai.