May 14, 2026
Thursday
New Diakkawn Branch YMA, Kolasib chuan Mizo hmeichhiate buma, inzawrhluihtirna-a a mawhphurtu bera ngaih an veng mi Lalnunsiami (30) d/o R Rinzuala leh a unaunu chu an veng leilung rah an phal tawh lo.
New Diakkawn YMA chuan thuchhuah siamin, tun hnaiah social media hrang hrangah an veng hming mawi lo takin a darh thu tarlangin, “Veng mipuite pawhin hrehawm kan tiin kan lungawi lo tlang hle a ni. Kan veng hming mawi lo taka thantirtu, Lalnunsiami (30) d/o R. Rinzuala (Diakkawn Field bul) leh a kawppui/pasal hnamdang (vai) te chungah hian YMA chu a lung ni lo hle a, an thil tih tha lo tak hi kan dem takzet a ni,” an ti.
Mizoram Police press statement atangin FIR an dawn thu leh an bawhzui dante an hriat thu tarlangin New Diakkawn YMA chuan, “Beauty Queen Salon & Spa, Rudrapur, Udham Singh Nagar Distirct; Uttarakhand a mi hi Lalnunsiami leh a kawppui hnamdangte ta a ni a, report thehluttu leh an mi chhawr hmeichhia kum tling leh tling lote chu inzawrhluihtir an nih thu te tarlan a ni,” tiin inchhawrluih leh nawhchizawrhna lam thilah hian a laizawn, Lalramzauvi leh a kawppui Lunglei lam mi nia sawi chu inhnamhnawiha ngaih niin man an ni tih an tarlang.
New Diakkawn YMA chuan, “He thil thleng duhawm lo tak hi kan ngai thu tak hle. Ni 12.5.2026 tlai khan executive committee thutkhawm hmanhmawh koh niin an chungchang hi rel a ni. Lalnunsiamite nupa leh a unaunu, Lalramzauvite hian thuleh awm hma chu kan veng leilung hi an rawn rap tawh tur a ni lo ang; hei hi khauh taka kenkawh a ni dawn. Tin, thubuai la kal lai te a nih vangin thui tak sawi theih a ni lo. Mah se, an chungthu hi kan vil zui reng dawn a, case chinfel a nih thlengin enzui an ni ang. An chungchangah hian thutlukna a zirin YMA chuan a tul angin thuchhuah te nei lehin hma a la zel dawn a ni,” a ti.
