Antilia-ah Esther Hnamte a zai dawn

Mizo naupang, a zaithiam avanga India ram mipui hriat hlawh Esther Hnamte, Lunglei College Veng chuan zanin hian Asia rama hausa ber Mukesh Ambani sawmna ti hlawhtlingin, an chenna in Antilia, Mumbai-ah a zai dawn.

Esther Hnamte hi billionaire Mukesh Ambani chuan zai turin a sawm a, a zaina programme tur pawh a satliah lo. Ambani chuan zanin hian India rama infiamna ngaihhlut hlawh ber cricket-a India mipa leh hmeichhe team-te an hlawhtlinna an chenna inah hian a lawmpui dawn a, hetah hian Esther Hnamte hi a zai dawn a ni.

Khawvela mimal in, chenna atana hman manto ber nia sawi thin Antilia chhunga luh hi mi tam takin an chak an theih si loh a ni a, pawn atanga entu ringawt pawh a ngah hle. Esther Hnamte chu a lut mai ni loin a zai dawn. Esther-i hi a nu leh a putea ten an hruai a, India rama milar fuankhawm hmaah Hindi film Kesari (2019) a hla lar tak Teri Mitti tih a sa dawn.

Tarlan tawh angin Esther Hnamte hian India rama naupang chawimawina sang ber Pradhan Mantri RashtriyaBal Purashkar chu December 26, 2025 khan President Droupadi Murmu hnen atangin a dawng a ni.