Brigade Field siamna tur dah a ni &#8211; ZPM Thalai

ZPM Thalai chuan thuchhuah siamin, Brigade Field siamṭhatna tur atana ZPM Sawrkar hmalakna chungchangah inhnialna awm thei turin opposition party-ten RTI hmanga zawhna leh Assembly Session-a zawhna hmangin mipui rilru hruai kawi an tum ṭhin pawi an tih thu tarlangin, “Brigade Field siamṭhat nan a sum ruahman kan lo tarlan tawh Rs. 500 lakhs chungchangah Rs. 600 lakhs zawka tihsan a ni,” a ti.

MNF Sawrkarin Brigade Field/AMC Playground sak nan Rs. 504 lakhs lo seng tawh mah se, inkhelhna tlak a ni lo tih chu Aizawl mipui ten chiang takin an hriat thu tarlangin ZPM Thlai chuan, “
A veng neitute rilru pawh a na hle a ni tih AMC election lai khan kan hre thei awm e.
Hei vang hian kan Chief Minister chuan Brigade Field hi inkhelna tlaka siam leh turin ZPM Sawrkar chuan Rs. 500 lakhs a ruahhman thu a lo sawi tawh a ni.
Brigade Field siam ṭhatna tura ZPM Sawrkar hmalakna sawi nep tumin MNF Party chuan an theihtawp an chhuah ve a, tun Assembly Session hnuhnung berah pawh MNF MLA Pu Lalrinsanga Ralte chuan Brigade Field siamna atana sum ruahman chungchangah zawhna hmun tur ni miahlo UD&PA ah zawhna zawtin, UD&PA Minister Pu K Sapdanga’n a Department enkawl lai mek UD&PA in Brigade Field sak ṭhatna tur ruahmanna an siam loh thu in a chhanga, zawhna tur hmun dik tak Sports & Youths Services emaw State Sport Council lamah he zawhna hi zawt se chhanna dik tak a hmu mai tura ngaih a ni a, MNF Sawrkar anga Sports Minister bawhchak tak, health leh education atana sum ruahman pawh khelmual astroturf phah nana lo pawt peng zel ṭhintu ZPM Sawrkarah chuan an awm tawh lo a ni tih a hriat loh vangah kan ngai bawk a ni. Hei bakah hian June 2026 khan MNF Legal Board Vice Chairman Pu Lalpianfela Chawngthu pawhin mipui rilru hruai kawi nan Finance Department ah RTI hmangin zawhna a lo zawt tawha, kum tir lama FY 2026-2027 atana Assembly Budget Session neihah Finance Department-in Brigade Field siam ṭhat na liau liau tur budget-ah passed a nih leh nih loh zawtin, hetah pawh hian Finance Department chuan Brigade Field siamna tur bik FY 2026-27 ah passed ni lo mahse sum hnar remchang dang aṭanga an ruahmanna an siam tur thuin an lo chhang tawh a ni,” tiin Brigade Field hi inkhelhna tlaka siam turin ZPM Thalai chuan han la zel tih an tarlang.

ZPM Thalai chuan Chief Minister Lalduhoma leh Sports Minister Lalnghinglova Hmarte pawhin an vei hle tih tarlangin, “Hei vang hian Sports & Youth Services Department chuan SASCI 2026-2027 Part I (untied) ah Rs. 600 lakhs ruahmanna siamin Finance Department (Expenditure Control Branch) chuan Administrative Approval a pe tawh,” an ti.