News

Chief Minister Lalduhoma chuan zanin (27.2.2026) hian Assembly Session-ah Lengpui Airport ram CBI hnena an refer tawh thu sawiin, ram hralhna/hawhtirna pawisa MLA zinga an account-a lut an awm chuan MLA atanga banah a cho.

CM chuan Lengpui ram chungchang sawi chhuah a nih leh thin thu sawiin, “Kan sawifiah vek tawh a, a ngai tho kan sawi leh. Sawi leh pawh a chakawm loh vek tawhin ka hria. Tunhnaiah Lengpui VC leh NGO ten ‘no objection certifcate (NOC) kan peklai kan hre lo’ an ti, a rapthlak khawp mai. Ngatinge sorkar hmasa khan branch YMA, VC leh civil society remtihna kan thil tel tih an thehluh theih le. Tunge thil tisual? A hunlaia an hriat hauh loha an lo ti a nih phei chuan a serious khawp ang,” a ti.

Eptu (MNF?) te chu Lengpui ram chungchang hi sawi sawi ve tur an nih zawk thu sawiin Lalduhoma chuan, “Certifcate lem an lo thehluh sak a nih phei chuan kan nat pui khawp ang. Tin, social impact assement (SIA) kan sawi leh thin. I veilam (MNF?) a mite khan an term chhungin vawi 120 an pe,” tiin an term chhunga vawi khat an pek ve ngatinge an sawi an sawi tiin zawhna a siam.

Chief Minister chuan Lengpui ram aia rapthlak tur hi Kolabari, Sairanf ram lak chungchang a hriat thu sawiin, “He House ngeiah statement siam ka duh maithei. Sorkar hmasa sulhnu vek. Heng hi document awm vek a ni. Mipui hnena in au rin siak ngawt a ni lo. A hun, a hmun, document a awm vek,” a ti.

Chief Minister chuan tun thla ni 23 khan CBI hnenah Lengpui ram an refer tawh tih sawiin, “CBI chhui turin kan tifel tawh. Ram neituin a chan a awm a, a ram commission tirtuin a chan awm a, an account-ah a lut a, midang account-ah a lut lo. Chu an account atang chuan an rawn chhui leh mai dawn a lawm mawle,” tiin pawisa luhna account an awm chuan banah member-te a cho.