News

ZPM Media Chairman B Lalchhanzova, MoS chuan vawiin (31.1.2026) hian Aizawl Press Club-ah press conference neiin, MNF Sorkarin Lengpui ram Indian Air Force (IAF) hnena hralh/hawhtir an tum chu ZPM Sorkarin tha ti loin, hawh tura an tihfel tak thu leh he ram lei hi Central Bureau of Investigation (CBI) chhuitir ngei se an duhthu a sawi.

B Lalchhanzova chuan Chief Minister hnena file a thlen hma ni 27.06.2025 ah Lengpui leh Sihphir a ram leina sum chu Mizoram Rural Bank, Aizawl DC Account-ah an lo thun fel der tawh tih sawiin, “Sawrkar hmasa hunlaia an lo tih tawhte leh ZPM Sawrkar hnu a Revenue Department-in fimkhur thei ang bera a kalpui dan enin ‘A nih ang ang a kalpui ni mai tawh se’ tih chu CM tan chuan tih awm tak a ni. He thilah hian umzui tur tamtak a awm ngei anga, mipuite pawn thudik hriat hi kan chanvo a nih avangin ZPM party chuan CBI chhui tir ngei kan duh,” a ti.

Revenue Minister kal chhuak ta Lalruatkima, MNF Treasurer leh MPCC Sr. Vice President Lalnunmawia Chuaungo chu CBI-in an chhui theih tura FIR thehlut ngei turin an phut thu sawiin B Lalchhanzova chuan, “Kan lo ngaichang dawn a ni. An thehlut ngam lo a nih chuan engemaw hlauh an nei ni ah kan ngai ang. An thehluh ngam ngei pawh kan ring a, IAF ram kaihhnawihah mipui ten thil awm dan dik tak kan hriatfiah phah thei dawn a ni,” tiin uluk taka document-te han chhui leh an indawr tawn dan han en letin MNF Sawrkar lai khan lo ti fel hman ta se, IAF hnenah hian chatuan atan Mizoram leilung hi an lo hralh fel hmak dawn tihna a nih thu a sawi.

ZPM Media Chairman sawi danin, Sihphir leh Lengpui ram chungchanga hming lang thenkhatte chu Rohmingliana, Lengpui area leh Zoramthanga, Sihphir ram Garden Pass No LSC No G72 of 1990 and three others. (No. F. 14022/327/2019-DC (A) 38-46 Dated 2nd September 2021 from DC Aizawl letter to
Defence Estate Officer Guwahati Circle) a ni. Heng bakah hian he thil kaihhnawih hre tura ngaih politician-te chu Revenue Minister hlui Lalruatkima leh Planning Board Vice Chairman hlui H Rammawi (rang zawka hmala tura Aizawl DC a nawr thu kan hmu) leh MPCC Sr Vice President Lalnunmawia Chuaungo an ni. Lalnunmawia Chuaungo hi MNF hunlaia IAF hnena ram hralh tuma hmalak hun lai khan ni 12-2-2019 to 29-10-2021 chhung Mizoram CS a ni. Kha tih
hunlaia DC te enkawltu GAD changtu chu Zoramthanga Ex CM hi ni bawk. Anni hian thudik sawi duhse sawi tur an nei hlawm ngei anga, an ngawi ral dawn nge thudik inthup an puang dawn tih chu kan nghak ta thup mai a ni.

IAF nena an indawr tawnnate hi a pulunga hralh tuma indawrna/outright purchase vek a nih thu sawiin B Lalchhanzova chuan, “Mizoram in inhumhimna kan neih Bengal Eastern Frontier Regulation Act 1873 te, Mizoram Land Revenue Act 2013 te hi sawi lan a ni ngai lo. Outright purchase an remtih lohna sawilang miah loin IAF hnenah hian ram hi hralh an lo tum hle a ni. Ka chauha Article 371G aupui nasa em emtu MNF Party-te hian ram himna sawilang duh miah lo a hetianga hma an lo hi nationalism kengtu party in ti ngam tur an ni zel dawn em ni? MLARR Act 2016 Dan/Act hnawl tawh pawh kha a tulna angah chuan hman
theih a ni tih pawh a hrechiang tu an ni.,” a ti.

ZPM Media Chairman chuan a tir atang rengin ram lak tur hi tinzawn neisa an ni tih document atangtein a hriat hle tih sawiin, “August 2, 2018 ah Mizoram CS hnenah IAF-ten ram an mamawh thu an thlen a, September 1, 2018 hian Lengpui ram neitu hian CS hnenah ram a neih thu a thlen nghal. January 22, 2019 a DC Aizawl in CS hnena lehkha a thawnah phei chuan heng ram pahnih bak hi Aizawl District ah hmun remchang dang a awm loh thu a ziak hial a ni. ZPM sawrkarin thil awm dan a lo hriata a zirchian hnu in MNF-in ram hralh a lo tum dan outright purchase chu a him lohzia hriain (outright purchase hi danah ziahlanna a awm lo) Land Acquisition dan ang thlapa hmalak tha a tih angin hmalak zui ani ta a, tuna IAF te ram lak hi a hawha hawhtir land lease kalphung anga kalpui tur alo ni ta a ni. Defence Ministry chuan form awmsa hmangin rules 7 hmanga an rawn dil hunah state sawrkar chuan rules 7 (3) (a) hmangin a hawhtir thei ang,” tiin dan ang taka IAF hnena ram hi hawhtir tur a lo nih tak avangin Lengpui leh Sihphir ram hi Aizawl DC kutah a awm tak thu a sawi.

B Lalchhanzova chuan Lalduhoma kaihhruai sawrkar; mipui sawrkar hi he ram leina thilah hian a kut a fai hle nia sawiin “Kan chhuan em em kan CM hi kum 10 aia rei CM tura kan vauchher a ni bawk a, he thilah hian a kut a fai tih kan hria a, kut fai lo a ngai kan awm a nih chuan lipse kan ngam. Kei Revenue Minister pawh hian ka ngam a, mipui kuta awm kan ni a, politics inbeihna ringawtah he thil hi tawp lo se kan duh takzet a ni. Tute hnenah nge ram man hi a luh tih te, tu te nge mantang ei tih te hi mipui hriat chak zawng tak a ni ngei anga, hunin a la rawn hai lan ngei i beisei ang,” a ti.

Zawhna chhangin ZPM Media hotute chuan, “Miin thil tisualah min puh a, ‘hei miin thil tisualah min puh, kan tisual ngei em min chhui rawh u’ tia min chhui tura complaint thehluh chu thil kalhmangah kan ngai lo. Thi tisuala min puhtu an awm a, chumite chuan kan tihsual leh sual loh min chhuitir turah kan ngai. Sorkar atang chuan CBI chhuitir turah harsatna a awm dawn loh thu kan CM-in a sawi tawh a, prosecution order sanction a ngai a nih pawhin harsatna sorkar chuan a siam dawn lo,” tiin thil dik lo tia ZPM Sorkar puhtute’n CBI-in an chhui theihna atan complaint an thehluh ngei an rin thu an sawi.