News

MNF chuan vawiin (24.1.2026) hian Aizawl Press Club-ah press conference neiin, Indian Air Force (IAF) hnena Lengpui ram hralh a nih danah dan bawhchhiatna nasa taka a thlen thu sawiin, “CBI chhuitir ngei kan phut,” a ti.

MNF Media Chairman Lalruatkima, MNF Treasurer chuan ram lak/hralh a nih tur thu sorkarin dan ang taka hriattirna, preliminary notification a tih chhuah atanga ni 70 chhung lekin ram neitu dik tak pawh ni lo, a buaipuitute kutah cheng vbc. 188 zet pek chhuah vek hman a nih thu sawiin, “Ram lak kalpui dan (acquisition process) chak ber record a nih a rinawm. Lengpui-a ram neitu mi pariatte hmingin ram leina man, compensation/award hi siam a nih laiin, heng ram pariatte leikhawmtu nia insawi Rohmingliana hnenah Aizawl DC Office chuan ni 25.07. 2025 leh 26.08.2025 te khan a belhkhawmin cheng vbc 70 a pe chhuak a, a bak zawng cheng vbc. 117.90 zet chu ram neitu ni ve miah lo, a buaipuitu nia sawi, Henry Lalremsanga Hlawnmual hnenah ni 25.07.2025 khan pek vek a ni,” a ti.

Award/compensation siamna hming tumtu, ram neitu dik tak mi pariatte chuan cheng khat mah an chang ve lo thung tih sawiin, “Chief Minister Lalduhoma kaihhruai ZPM Sorkar hian hna hmasa berah IAF hnena Lengpui Airport hralh a tum nghal. Sorkar hmalak dan Assembly House-a sawi chhuah a nih tum ni 21.2.2025 khan tuna IAF hnena ram hralh tak chungchang hi Chief Minister chuan a sawi chhuak a, file mu tawh sa reng chu ‘tih tawp (kept in abeyance) a ni’ tiin ropui hmel takin a sawi,” tiin hun rei loteah a ruka file chu ko kal leh thutin a hmanhmawh thei ang ber leh dan tam tak kal kan leh palzut chungin hma a lo la char char zawk tih a lo lan thu a sawi.

Assembly House-ah hmalakna tih tawp a nih thu a puan atanga thla 3 pawh a ral hma 15.5.2025-ah Lengpui ram, IAF-te hnena hralh tura dan ang taka hmalakna hmasa ber, ‘Preliminary Notification’ chu Mizoram Sorkar chuan a ti chhuak ta tih sawiin Lalruatkima chuan, “Aizawl DC Office chu ram lak/hralh tur enfiah hna preliminary survey thawk nghal tur leh ni 15 chhunga land record te chingfel vek turin notification hmang hian Mizoram Sorkar chuan a hriattir. Hmanhmawh taka thil kalpui anih avangin RFCTLARR Act, 2013 hnuaia ram lak a nih dawna tih hmasak ngei ngei ngai ‘Social Impact Assessment (SIA)’ pawh kal kan (exempt) a ni a, SIA kal kan phalna hi Land Revenue Minister B Lalchhanzova chuan ni 15.5.2025 ah tho khan a pawmpui (approved) chuk chuk a ni. SIA kal kan phalna Revenue Minister in a pawmpui ni veka preliminary notification tih chhuah nghal rum rum a nih bakah hian, preliminary notification hi danin a phut anga puanzar a ni lo a, a ram neitu Lengpui khawtlang hruaitute hriattir an ni lo a, chanchinbuah pawh chhuah a ni lo. Sawisel duh neite tana ni 60 chhung hun hawn thin pawh ni 15 lekah pawh tawi a ni a, a ruk thei ang ber leh a rang thei ang berin, dan tam tak kal kan leh palzut chungin, ZPM sorkar hian Indian Airforce kuta Lengpui ram hralh anih theihna tur hian hma a la,” a ti.

Cheng vaibelchhe 188 vel zet hu ram hralh buaipui hna hi ni 70 chung vel lekin, a bul atanga a tawp thlengin an zo fel vek tih sawiin, “ZPM Party-in midang aia tha bik, dik bik leh fel bik tur a mipui hma a nasa taka an inzawrh hnuah Mizorama ram lei scam/scandal lian ber a lo thleng ta mai hi zahthlak kan tiin pawi kan ti a, hmanhmawh tak leh hnawhsarum taka hma lak a nih dan en hian sorkar thuneitu sang atanga nawrna a na hle tih a chiang a, CM leh sorkar thuneitute hi thuk takin an inrawlh ngei niin a lang. Assam Rifles Biak In hmun pawh party office atana it ngawih ngawihtute hi party office leina sum tuak kawnga an thahnem ngaih zia mipuiten kan hre vek. IAF ram tur leinaah hian dik lo taka hlawkna teltu, mantang eitu zawng zawngte chhui chhuak vek a, dan anga hremna lek kawh anih ngeina turin CBI chhuitir kan phut tlat a ni,” tiin CBI chhuitir a nih loh chuan mipuiin man tang eiah ZPM chu an ngaih ngei tur thu a sawi.