Central-in ZPM an hrek mek &#8211; Lal Thanzara

MPCC President Lal Thanzara chu vawiin (21.10.2025) hian Dampa Bial MLA by-election atan a campaign a, beisei an neih thu leh Central Sawrkarin ZPM a hrek mek thu a sawi.

Lal Thanzara chuan ruling party-in an candidate hi an duh ber nia a lan loh thu sawiin, ‘MNF pawh hmanni lawka sawrkarna siam an ni a, an candidate chungchangah an party chhungah sawi neuh neuh a awm awm e. Heng karah hian beiseina kan nei a ni. Congress Party hi inthlan dawna kan party intiamna tihlawhtling ṭhin kan ni. Tuna sawrkar mekte leh MNF-te hian an intiamna an tihlawhtling ngai lo,’ a ti.

Kawng a chhia a, lirthei khalhtute an nuar tih sawiin MPCC President chuan, ‘Bana Kaihahte pawh mipuite an beidawng em em. Central scheme awmsa an mahni siam angin an sawi mai mai. Keini chuan NLUP keimahni scheme siam kan sawi a, kan tihlawhtling a, chhungkua nuai khat leh sing li chuang NLUP hmangin kan chhawmdawl a ni. ZPM Sawrkar hian sum leh pai an nei loa, Central Sawrkar dawrin an thlalakte pawh kan lo hmu awm e,’ tiin BJP sumin an campaign a, an intiamna ang an tih leh loh avangin Central Sawrkarin an hrek mek niin a sawi.