Chakma khuaah vote punna a sang

MZP hruaitute chuan vawiin (23.6.2026) hian Aizawl Press Club-ah press conference neiin Chakma khuaah vote punna a nasat thu an sawi a, “India leh Bangladesh khua leh tui nei kawpte kan hmu chhuak,” an ti.

India ram pum huapa Election Commission of India (ECI) in Special Intensive Revision (SIR) a kalpui mek chu India khua leh tui dik takte tana dikna chanvo humhimna leh electoral roll dik tak leh thianghlim zawk kalpui tumna a nih avangin an thlawp tlat thu sawiin MZP hruaitute chuan, “Mizoram chhungah pawh SIR hi Mizoram mi leh sa dik takte chauh an awm theihna tura kalpui a nih theih nan, theihtawp chhuah turin thuneitute kan ngen nghal a ni,” tiin, MZP chuan, ram leh hnam humhimna kawngah hun rei tawh tak atang khan hma an lo lak tawh thin thu an sawi.

MZP hruaitute chuan SIR dik leh felfai taka kalpui a nih theihna turin tun hma atanga a ram miten foreigner pun chakna thin constituency a khuate an enfiah tih sawiin, “SIR-in a base 2005 E-Roll leh roll thar ber E-Roll (2024) atangin danglamna khaikhin a ni a, Chakma khua bikah vote percent punna sang lutuk leh 2005 E-Roll a khaw awm lo, a hnu a khaw 97 rawn awm tharte leh India leh Bangladesh khua leh tui nihna nei kawpte kan hmu chhuak. E-Roll a House number awm lo pawh hmuh chhuah a ni.

An thil hmuh chhuah chungchangah hian MZP chuan Chief Electoral Officer (CEO) hnehah complaint an thehluh dawn thu sawiin MZP hruaitute chuan, “Complaint a tarlan khaw 195 te chu Special Intensive Revision (SIR) kalpui mekah en uluk leh zual turin kan ngen nghal. Heng khaw 195-ah hian SIR hi kalpui a nih tawh pawhin, DEO-te nen ngei ennawn leh turin MZP chuan’a ngen a, he hmalaknaah hian MZP chuan a tul anga thuneitute thawhpui a inhuam reng a ni,” an ti.