Chakma tan MNF nih a rem lo &#8211; Lalduhoma

ZPM Legislature Party (ZLP) Leader Lalduhoma, Chief Minister chuan nimin (1.11.2025) khan Marpara North Community Hall-a public meeting-ah Marpara North aṭangin BJP 11, Congress 5, MNF 22, neutral (5) mi 43 leh Lianbuang (Bekabekia) aṭangin MNF 4, BJP 2, INC 1, an vaiin ZPM-ah mi thar 50 a lawm lut niin ZPM chuan an tarlang.

Lalduhoma chuan thu sawiin, “Inthlan hian keimahni leh tu leh faten eng nge nghawng a neih tih ngaihtuah turin ka chah duh che u a ni. Tuna pawisa petute ni loin, nakina in tu leh fa, khawtlang leh bial tân zel kan ngaihtuah dawn a nia,” a ti.

UT aṭanga kum 53 a nih tawh hnuin India rama district 800 vel awm zingah Dampa Bial awmna district chu district changkang lo, ‘Aspiration District’ zinga a la tel chu pawi a tih thu sawiin ZLP Leader chuan, “District changkangah chhuah che u kan tum a ni. PC sorkar zeuh bak chu MNF leh Congress hlirin an enkawl che u a, hei hi in thleng a ni,” tiin ruling candidate Vanlalsailova thlang tling turin a ngên.

Chakma mipuite chu mikhualte chunga ṭha tak an nih thu sawiin, Lalduhoma chuan, “India leh state hian inlaichina ṭha kan duh a, India leh State hian India khua leh tui diktak Chakma-te kan en hrang dawn lo. MNF khan an sorkar tirhin CADC ṭhiah an sawi a, an ṭhiat thei ta lo. MNF Party chu Mizo tih niin, Chakma tan MNF lo nih a rem ve lo,” a ti