Chanchin tha hril tura hnam thlan kan ni &#8211; Zoramthanga

Vawiin (16.12.2025) chhun khan Lungleia MNF office-ah Exodus Day leh kum 2025 puala office khar pualin inkhawm buatsaih a ni a, an hun hmanpuitu MNF President chuan an party chuan chanchin tha hril tura hnam thlan kan nih thu sawiin, missionary nuai khat thawn chhuah chungchang a sawilang.

MNF President chuan khawchhak atangin kan pi leh pute lo chhukin, an ram zawn Mizoram Lalpa’n a pek lo thlengin an tawp tawp tih sawiin, “Kum 20 chhung hnam thuthlung humhim turin independent sualin, nationalism-ah thisenin min baptist a ni. Party dang lian tak tak an ral zel hunah pawh bul tan leh thei turin Pathianin Exodus Day hmangin min huma min damkhawchhuahtir chhan chu, ‘Pathian leh kan ram tan’ tia kum 64 hmu ta MNF party te hi Chanchin tha hril tura a hnam thlan kan ni,” a ti.

Missionary nuai khat thawn chhuak tura hmathlir a lo sawi tawh chung chang sawi langin Zoramthanga chuan, “Kohhran lian ber Presbyterian Kohhran chuan nuai thum leh singkua vel zet an thawn chhuak tawh. Kohhran dang nen chuan nuai nga chuang an nih ka ring tawh,” tiin population thirin khawvelah USA khumin Mizoram chu khawvelah missionary tirchhuak hnem ber a nih thu a sawi.