News

Vawiin (13.3.2026) hian Mizoram hmun hrang hrangah Chapchar Kut hman a ni a, Aizawlah chuan Lammualah hman a ni. ‘Kut Pa’ Chief Minister Lalduhoma chuan inremna a awm theihna atan social media-a kan thu post leh comment fimkhur turin mipuite a sawm.

Chief Minister chuan khawvel hmun hrang hranga awm Zofate Chapchar Kut chibai bukin, Hlim taka hmang theuh turin duhsakna a hlan a, “Kan pi leh pute khan Chapchar Kut hi hlim taka hman ngei an tum thin avangin tumah an inhau duh ngai lo a, inremna hunah amang thin. Vawiina kan thupui “Zo nun ze mawi – Inremna” hiChapchar Kut nen a inhmeh em em a ni. Inremna hi kan lal leh an upate pawh khan an ngaihlu a, ro an relna tinrengah ‘Chalrem’ leh ‘Saui tan’ dan hi thiam takin an hmang fo thin. Inremna atana thil pawimawh tak chu a mawhphurtu nih ngamna leh a tul anga thupha chawi ngamna hi a ni,” a ti.

Kan thiam lohna leh fel lohna teah midang puhmawh loa ‘ka thiam loh a ni e, ka mawh a ni e’ tih ngamna hian inremna te, damnate a thlen thin tih sawiin Lalduhoma chuan, “He kut atang hian mawhphurhna la ngam turin i huaisen thar ang u. Inremna a awm theih nan social media-a kan thu post leh comment te pawh hi i fimkhur ang u. Politics thila ‘lim inhalsakl te hi kan hnamzia a ni lo. Rorelna hmunah tawngkain inkhak bawrh bawrh mah ila kan inhaw zui ngai reng reng lo. Inngeih takin kan inkawm zui leh mai thin. Inremna Kut kan hmang a ni tih hriain vawiin atang hian mi zawng zawngte inrem thar leh ang u,” tiin mipuite a sawm a ni.

Kumin Chapchar Kut hi hapta khat chhung hman a ni a, March 9, Thawntanni khan Kut Tlan hmanga bul tanin, kut pual Handloom, Textile & Handicraft Exhibition and Food Processing and Food Court te, Flower Show te, Living Museum (Live demonstration of Mizo Typical Life) te, Photo, Painting Exhibition leh Chapchar Kut Film show te hapta khat chhung atana buatsaih zui niin vawiin hian a lawmna pui ber hi buatsaih a ni ta a ni.