Chapchar Kut hman dan tur rel fel

Vawiin (20.1.2026) chawhma khan Chief Minister Lalduhoma kaihhruaiin Chapchar Kut 2026 Organising Committee-te chu CM Conference Hall-ah an thukhawm a, kum 2026 Chapchar Kut programme kimchang an duang fel. Kar khat chhung lawm tura ruahman a ni.

March 9, 2026 Thawhtanniah kut puala tlan (Kut Run) neia kut lawmna bul tan tur a ni. He tlan (run) pual hian kum dang ang bawkin Central YMA -in anmahni sensoin t- shirt a lo buaipui leh ang.

Ni 10 ah Handloom, Textile & Handicraft, Food Processing & Food Court hawn a ni ang a, a hmun tur la ruahman fel a ni rih lo. He mi ni vek hian Aijal Club Lawn-ah flower show hawn tan a ni ang.

Ni 11 ah Painting, Photo Exhibition leh Chapchar Kut Film show Vanapa Hall leh Lianchhiri Runah hawn a ni dawn.

Ni 11 leh ni 12 vek hian Living Museum, Falkawn Zokhuaah neih a ni ang.

A lawmna pui ber hi March 13 Zirtawpniah Lammualah zing dar 10:30 atanga neih tur a ni a, darkar ruk chhung a awh ang. Lalduhoma, Chief Minister chu Kut Pa a ni ang a, C. Lalsawivunga, Art & Culture Minister chu kut thlengtu a ni ang. Bawlhhlawh hnutchhiah lo kut (Garbage Free Kut) kalpui tum a ni.

Kum 2026 Chapchar Kut thupui atan hian “Zo nun ze mawi – Inremna” tih chu committee hmasa lamah lo thlan fel tawh a ni.

Kumin atang hian Chief Minister chawimawina Nopui sem a ni tawh dawn. Nopui dawngtlaka ngaih rawtna hrang hrang lut zing atangin a tum khatnaa dawngtu turte chu vawiina committee hian an thlang a ni. Chief Minister Nopui hian pawisa fai cheng nuai 1, citation leh memento-te a keng ang.