Cheng vbc. 5.2 senna tur project hawn a ni

Nizan (22.1.2026) khan Public Health Engineering (PHE) Minister Prof. Lalnilawma chuan, AMRUT 2.0 hnuaia thawh tur, mahni in leh kawtkaia kartluana chatlak loa tui herhhaw theihna tur ’24X7 Pilot Project’, Vaivakawn leh Chawnpui eng hmun thenkhata kalpui tur chu a hawng. Hawnna inkhawm hi Helen Lowry Auditorium, 7th Day Tlangah buatsaih a ni a, Bialtu MLA Lalnghinglova Hmar bakah TBC Lalvenchhunga, Adviser to Chief Minister (Finance) leh Lalmuanpuia Punte, Adviser to the Chief Minister (Political) ten PHE Minister hi tawiawmin, Local Council hruaitute leh mipui thahnem tak he hunah hian an tel.

PHE Minister chuan 24X7 tui herhhaw theihna tur project chu Mizoram tan mellung pawimawh tak a nih thu sawiin, “UD&PA kaltlanga MoHUA atanga hmuh a ni. Cheng vbc 5.24 seng a thawh tur niin, pilot project a nih angin chhungkua/In 300 a huam dawn. Smart meter vuah vek tur niin, project atan hian pipeline network thar hman tur a ni. Tuna a huam phak loh tan pawh ruahmanna siam lawk nghal dawn,” a ti.

Hmasawnna hna thawh kawngah department-ten harsatna hrang hrang an tawh thin thu sawiin PHE Minister chuan, “Hna thawh nan in hmun leh ramte khawih chet a ngaih chang a awm fo thin avangin veng thenkhatah chuan veng neitute’n an rem ti lo thin. Forest leh environmental clearance kawnga harsatna awm thinte avangin hna thawh a harsat chang a tam,” a ti a, chutiang a nih laia 24×7 Pilot Project kalpuina tura veng mipuite inpeknaah lawmthu sawiin, theihtawp chhuahpui turin a sawm nghal.

24X7 Pilot Project Report-a tarlan tlangpuite:

24×7 water supply hna hi thla 4 atanga thla 6 chhunga zawh fel tum a ni.
He 24×7 System ah hian IoT (Internet of Things) leh Scada Unit te integrate (hmankawp) tum a ni. Tui Level monitor na tur ultrasonic level indicator te, automated valve leh flow meter te tuizemah install a ni anga, consumer 300 te hnenah smart water meter a thlawnin vuah sak theuh an ni dawn a, eng emaw zat connection pipe leh distribution network thar siam a ni dawn.
Mobile phone-a message leh thla lakte inthawn dan ang deuhin he system hian hna a thawk dawn a, consumer water meter reading te, tui a dawn zat te, valve hawn leh khar te, tui zem a tui level leh tuizem atanga tui chhuak zatte gate-way leh cloud storage hmangin communication, monitoring leh operation siam tum a ni.
Mobile apps leh cloud storage-te hmangin a enkawltu engineer-ten control room emaw, an smart phone atangin emaw tuizem a tui level te (real time monitoring), tuizem atanga tui chhuak zat te, valve hawn leh khar te, consumer-in tui an hman dan te, an meter readingte a hmuh vek theih dawn a, tin, signal-in a man that theih lohna hmuna smart meter-te hi hand held device kengin a bul hnaiah emaw signal a man phakna a kal chuan an meter reading a lak theih vek dawn bawk.
He apps atang hian consumer ten an tui hman tawh dan te, tui an hman tam lutuk chuan warning an hmuin an en thei dawn bawk a ni.
He 24×7 System hian lang tlang, rintlak leh him tha, tui hnianghnar zawk consumer-te pek a tum a ni.