Chief Minister hoin an lawm

Vawiin (1.1.2026) hian Generation Beta zinga India rama naupiang hmasa ber Frankie Remruatdika Zadeng chuan kum khat a tling a, a piancham hi Central YMA Hall, Tuikhuahtlangah lawm niin Chief Minister Lalduhoma’n a hman pui a, a tawngtai sak.

Chief Minister chuan, kum 2025 a India ram puma naupiang hmasa ber, chhuan thar, a hming atana Beta chhuan thar (Generation Beta) an tih mai Mizoramin kan chu a lawmawm dangdai hle tih sawiin, “He naute vang hian Mizoram pawh a hming tha hle a ni. Vawiinah a kum khatna kan lawmte hi a hlu ka ti a, hrisel taka lo thang lian zel turin duhsakna ka hlan a ni,” a ti.

Frankie Remruatdika Zadeng hi ZD Remruatsanga leh Ramnunzirite fa niin, ni 1. 1.2025 zan 12 leh minute 3 khan a lo piang a ni.

Kum 2025 kumthar ni, January 1 ațang khan Generation Beta era a ințan. Kum 2025 – 2029 inkara piangte chu Generation Beta hian a huam dawn a, nickname-ah ‘Beta babies’ tih an ni.

Gen Beta hi kum 2035-ah chuan khawvel puma mihring awm zat ațanga 16% an tling pha tura chhut an ni. Gen Beta member tam tak hi kum zabi 22-na dam thleng tura ngaih an ni bawk. Kum 2025-a piangte kha kum 2101-ah kum 76 mi an ni dawn a ni. Anni hmaa generation an lo thliar dan chu – Generation Alpha (2013 – 2024 inkara piang), Gen Z (1997-2012), Millenials (1981 -1996), Gen X (1965 – 1980) leh Baby Boomers ( 1946 – 1964) an ni.