News

Law Department changtu, Chief Minister Lalduhoma chuan vawiin (31.7.2026) khan Government Mizoram Law College Student Bar Council-ten zirlai pass chhuakte thlahna leh a lut tharte lawmna hun (Freshers Social & Felicitation) an buatsaih a hmanpui.

Chief Minister chuan thu sawiin, “Khawvel a changkang zel a, mitinin kan dikna chanvo kan ngaihlu tial tial. Dan hmanga rorelna (rule of law) a lo pawimawh tial tial a, dan lam thiamte kan mamawhna a pung zel a ni. Law behchhana hnathawktute hi mimal zalenna te, rorelna dik leh mipui sorkarna, kan ram kalphung lian pathum insuihfinna laia hnathawktute an ni. Dn sawifiahtu an ni ringawt lo a, ram danpui humhimtu, khua leh tuite dikna vengtu leh rorelna dik chelh dingtute an ni. Chuvangin, law graduate tan hnathawh theih a tam a ni,” a ti.

Zirlai kal chhuak turte chu an degree ni loin an hnathawh atang zawkin an teh dawn tih sawiin Lalduhoma chuan, “Taima taka in inzir zui zel a ngai a, in nun pawh in uluk a tul a ni. Zirlai lut tharte pawh ka lawmpuiin, hlawhtling taka zir chhuak turin duhsakna ka hlan a ni,” tiin dan hrilhfiahna lama fimkhur a ngaihthu a sawi.

Student Bar Council chuan Chief Minister hi college bus an lo dil a, an hman lai chu kum 2005 a mi a nih tawh thu an sawi. Chief Minister hian pek a tum thu a hrilh a ni.