Article

Vawiin (1.10.2025) khan Mizoram Bawm Student Association (MBSA) chuan Khawmawi Playground-ah Bawm hnam kut Tlanglut Kut lawmna leh 2nd International Bawm Cultural Meet an buatsaih a, Chief Minister Lalduhoma chuan Kut Pa niin a telpui.

Chief Minister chuan, Zo hnahthlak hnam peng hrang hrangte hian an hnam huikhawmtu, an unau hnam peng dangte nunphung leh tih dan zah thiam a, Zofate inpumkhatna ngaihlu tak si kan mamawh vek tih sawiin, ‘Bawm Student Association hi chutiang rilru pua Bawm unaute huikhawmtu chu a ni. Mizoramah mai ni loin Bangladesh lamah pawh Bawm Student Association hi tha takin an ding a, Bawm hnam tan an hlu a ni. Bawm hian hnam peng chi sawmruk vel zet a nei chungin Panghawi leh Sunthlate hi an lian fal a, hlawm hnih anga sawi in ni ta ber. Kutpui pawh a hran nei mahse Bawm zawng zawngte hman tlan Tlanglut Kut ngei behchhana Bawm International Cultural Meet in buatsaih hian MBSA-in unau inpumkhatna in ngaihpawimawhzia a tilang a ni,’ a ti.

Tlanglut Kut inkhawm hi MBSA Vice President B. Lalramchhana’n a kaihruai a, MBSA President Vanlalpianmawii pawhin thu a sawi.Mizoramah hian Bawm hi mi 30000 vel an awm niin an sawi a, LADC chhungah leh CADC chhungah an awm tam ber a, LADC ah hian Lai dawta hnam peng lian ber nia sawi an ni. Bangladesh atanga himna zawnga rawn raltlan hi mi 2500 vel an awm.