Chin hriat loa bo thiin an hmu

February 12, 2026 atanga chin hriat loa Myanmar-a chin hriat loa bo Lalramsanga (37) s/o Lalremsanga, Lawngtlai AOC Veng chu thiin hmuh a ni.

Thudawn danin, vawiin (15.2.2026) tlai dar 3 rik hma deuh khan Lawngtlai lamin Salachhuah, Myanmar-a lui pakhat, Chhimtuipui fintuah ruang chhar a nih thu an dawng a ni. A hnuah a zung bun atangin Lalramsanga a ni tih an finfiah thei. Engvanga thi nge a nih hriat a ni loa, a motor leh Myanmar mi motor inti palh tih erawh hriat a ni.

Salachhuah hi Lawngtlai atanga kms. 200 vel a ni a, he thuziahlai hian ruang la turin Central YLA leh MTP hruaituten Salachhuah an pan mek.

Vawiin chhun lama CYLA tarlan danin, Lalramsanga (37) hi maxx pick-up (MZ-O7A-2143) motor hmangin sumdawnna bungrua phurin February 12, 2026 khan Salachhuah Burma-ah a kal a, a hmun pawh a thleng ngei a ni. Amaherawchu, zan dar 9 atang erawh chin hriat lohin a awm zui.

February 13, 2026 zing karah Salachhuaha Burma pa pakhat (dawr neitu) hnen atang hian motor chabi leh licence-te chu Lalramsanga nau Lalthlamuana hnenah pek niin he Burma pa hi thu zawhfiah tum a nih laiin ‘engmah a hriat loh thu’ in a chhang a, a motor chabi leh driving licence-te erawh a motor chhunga a hmuh avanga pe mai a nih thu in a chhang a ni.

Hetiang hi kan tun dinhmun a thil thleng mek a nih avangin Joint Meeting (CYLA Lawngtlai & MTP Gen. HQ, Siaha) February 14, 2026 zan dar 7:30 Tipi Ferry-a thukhawm chuan uluk taka ngaihtuahin hetianga thil a thleng ta mai hi pawi a ti tak zet a, Lalramsanga chanchin kimchang hi hriat chhuah ngei a tum tlat a ni.

Lalramsanga chanchin kimchang hre thei turin vawiin (15.2.2026) tlai dar 3:00 thleng ngaihchan a ni dawn a, chanchin thar hriattur a awm lo a nih chuan naktuk tlailam dar 3:00atang chuan Lawngtlai Area chhung leh Siaha Area chhung atangin Burma lam sumdawnna kal kawng zawng zawng block vek a ni dawn.

Sumdawnna motor zawng zawng pawh dan chah vek an ni dawn. Chumi hnua thu thar hriat tur ala awmlo fo anih chuan joint meeting Central YLA leh MTP Gen Hqrs Siaha ten a tul ang zelin chak takin hma a la ang.