May 07, 2026
Thursday
Vawiin (7.5.2026) hian Champhaiah July 2025 leh January 2026 chhunga ramdang atanga dan loa cigarette lakluh man khawmte chu Controller of Legal Metrology thupek leh District Magistrate hriatpuinain Legal Metrology Office tual, Champhai Vengsangah tihchhiat a ni.
He hun hmanpuitu Champhai Addl. DC Lalbiakfela chuan, “Dan loa bungrua, a bik takin foreign cigarette lakluh do hian, sumdawnna dik lo kan do mai a ni loa, kan thalaite hriselna leh an hma hun kan humhalhna hmanraw pawimawh tak a ni. Heng foreign cigarette-te hi chhiah chawi loa lakluh an nih avangin kan economy tan chhiatna a nih rualin sum leh pai ai maha pawi zawk chu kan hriselna a ni,” a ti.
Heng meizial, flavor hrang hrang neia siamte hi thalaite tan a itawm hle tih sawiin Champhai Addl. DC chuan, “A thlum tui vang emaw a rim a tui kan tih kar hian, kan chuap leh kan taksa tana hlauhawm tak tak kan hip lut reng a ni tih kan hriat a, a dona kawnga theihtawp chhuah a tul takzet a ni,” tiin cigarette man khawmte hi a ti chhia a ni.
He huna tarlan a nih danin, Legal Metrology (Packaged Commodities) Rules 2011 rule 6 leh The Legal Metrology Act, 2009 section 18 in thuneihna a pek angin dan bawhchhiaa lakluh foreign cigarette-te man thin an ni. Dan loa lakluh cigarette-te’n chhiah an chawi loa, declaration mumal an nei loa, dan hnuaia zawrh chhuah thin cigarette hralhna chena a nghawng avangin man thin an ni.
Cigarette an tihchhiat hi brand hrang hrang packet 3,09,712, tualchhung rate-a chhuta cheng nuai 200 man hu a ni.
