CM hoin Kuhva Kut an hmang

Hachhek Bial Kuhva Chingtu Pawl (HBKCP) chuan vawiin (8.12.2025) hian Rengdil Sports Centre-ah Land Resources, Soil & Water Conservation Department nen tangkawpin Kuhva Kut an buatsaih a, Chief Minister Lalduhoma’n a hmanpui.

Chief Minister chuan an sorkar tirh phat atanga an hmalakna langsar zinga mi chu ruihhlo leh kuhva tawlhruk titawp tura hmalak a nih thu sawiin, “Na takin kan nawr. Kuminah Mizoram chanchina kuhva rate that ber kum a lo thleng ta. Rengdil khua ringawt pawhin cheng nuai sang chuang zet in lei a ni. Kuhva tawlhruk do hna thawktu – kan police te, kan tlawmngaipawlte, kan magistrate leh an thawhpuite pawhin an thawhrim rah – he chanchin lawmawm tak hi – an han hria ang a, an hlim ve ngawt ang,” a ti.

HBKCP President Kanan Lalhlimawmal pawhin thu sawiin, “Mizoram Sorkar chungah lawmthu ka sawi. A ruka kuhva tawlh hi a la awm zauh zauh nia kan hriat avangin, thuneituten hma min laksak zui zel se kan duh hle a ni,” tiin sorkar a ngen.

He huna tarlan a nih danim, kumina Hachhek biala HBKCP khaw 21-a kuhva chingtute sum lakluh belhkhawm hian nuai 5,078 a chuang tawh. An la hralh kal mek a, a fur rahte pawh hralh tur an la nei leh dawn. An lakluh hi a pung chho zel dawn a ni. Hachhek bial chhunga kumina kuhva hralh tam ber chuan cheng nuai 40 a lalut tawh.