CM-in Jesaia Room a hawng

Nimin (22.8.2026) khan Chief Minister Lalduhoma chuan Tawngtai Bethel Camping Centre (TBCC), Sakawrtuichhuna Banakaih (Handholding) Scheme hmanga camping centre sak, Jesaia Room, camper mi 80 atanga 90 leng chu a hawng a, “Tun atan chuan TBCC tel lo hian kan khawsa thei lo a ni,” a ti.

Chief Minister chuan 2023-a CM-a lakluh a niha a tlawh hmasak ber chu TBCC hi a nih thu sawiin, “A hnuah pawh ka tlawh leh a vawiin hi ka vawi thum tlawhna a ni. Tunah chuan in lo changtlung ta hle a, inthiarna leh kawt zawl tha tak in nei a, choka in nei hrang vek bawk a, in hmasawnnate hmuh a nuam hle mai. Sawrkar pawhin sum a neih ang angin ruihhlo ngaite chhawmdawl hna hi kan thawk a, TBCC ngei pawh hei kan hmuh angin Mosia room kan sa tawh a, tunah Jesaia room kan hawng leh ta. Heng kan hmalaknaah hian central YMA-ten min thawhpui tha thin a, kan lawm hle a ni,”

He camp-ah hian mi 805 an awm mek thu sawiin Lalduhoma chuan, “Thawktu tlemtein fel taka in enkawl zo thei hi a ropui ka ti In inpekna thukzia a lang a ni. TBCC vawi hnih lai a function loh tum khan Aizawl khawpui tan a buaithlak hle a, tun atan chuan TBCC tel lo hian kan khawsa thei lo a ni,” tiin TBCC a thawktute chungah lawmthu a sawi a ni.

Chief Minister chuan, lungin tang zinga za zela 98 hi drugs leh a kaihhnawih avanga tang an nih thu sawiin, “A tam zawk hi drugs zawrh vanga tang an ni ber. Za zela mi 41% te hi an tang nawn nghe nghe a ni. Chutiang dinhmuna kan din avang chuan ruihhlo avanga hliam tuarte chhawmdawl hi kan ngaihpawimawh a, Hulhliap Short Stay Centre-te kan din a, mi 192-te hnenah skilled training neihtirin, tunah hian mi 21 hnenah Banakaih (Handholding) Scheme kaltlangin eizawnna bultanna kan pe hial a ni,” a ti.

Central YMA President Pu R. Lalngheta pawhin thu sawiin, camper-te chu TBCC atang hlawhtling taka an chhuah hnuah an veng YMA-ten an lo lawm dawn tih hrilhin, kawng hlui zawh tawh lo va, nunna thar nena chhuahsan ngei turin a chah a ni.

TBCC Founder TT Zohmingthanga pawhin thu sawiin Chief Minister Lalduhoma’n TBCC a ngaipawimawh thin avangin lawmthu a sawi a, “Tun hnaiah pindan thar pahnih sorkar tanpuinain kan han nei thar a, damlo tam zawk kan enkawl theih phah dawn a, chhungkaw tam tak tan malsawmna a ni dawn a ni,” a ti.

Mosia room hi kumin March thla khan sak tan a ni a, thla 1 leh ni 22 chhung sak niin cheng nuai 13.82 sen a ni. Nimina Chief Minister-in a hawn Jesaia Room hi June ni 23-ah sak tan niin kar hmasa ni 15 khan sak zawh a ni a, cheng nnuai 14.58 sen a ni. A sakna sum hi sorkarin a tum a, a sak hna hi CYMA in a buaipui a, camper-ten tha an thawh thin.