CM-in lehkhabu a tlangzarh

Vawiin (1.9.2026) hian Chief Minister Lalduhoma chuan CM Conference Hall-ah Lalnunmawii lehkhabu ziah, “A tur a na tawh lo ve” tih a tlangzarh.

Chief Minister chuan Lalnunmawii’n ngawlveite enkawl hna kum 26 zet a thawh hnua ruihhlo dona kawnga a tawnhriatte atanga lehkhabu hlu tak a buatsaih lawmawm a tih thu sawiin, “Ruihhlo do zui zel tura a inpekna thute a lehkhabuah hian a hmuh theih. A ngaihsanawm hle a ni. ‘A kal tawhten a kawng chin an hria’ tih thufing ang deuhin ani hian ngawlveite chin a hria a, a lehkhabu hi ngawlvei mekte, an chhungkua leh ruihhlo do hna thawktuten chhiar vek thei ila kan hlawkpui hlein ka ring,” a ti.

Ruihhlo do hi sawrkar pawhin a ngai pawimawh a, YMA te, kohhran te leh NGO hrang hrangte nen nasa takin hma an la tih sawiin Lalduhoma chuan, “Supply reduction lamah leh demand reduction lama kan hmalaknaten rah tha a chhuah zel a, ruihhlo pawh a vang chho mek niin kan hria. Ruihhlo hi nghei theih a ni tih hi kan inzirtir thar a tul,” tiin sim tum tak takte chu sorkar pawhin kawng hrang hranga chhawmdawl a inpeih reng a ni thu a sawi.

Chief Minister sawi danin, Hulhhliap Short Stay Centre-ah pawh ruihhlo nghei chauh zirtir loin mahnia kea an din zui theih nan skill training an pe tel a, an zinga mi 21 phei chu Handholding Scheme atangin CM Special Package an pe tawh a ni. After Care Service lam an uar hian ruihhlo ti thin home-a lut a, an chhuah hnu rei lo tea ti leh mai zelho hi an sim hlentir theiin an ring.

Inkhawm hi CYMA President R Lalngheta’n a kaihruai a, Lallawmzuala Hauhnar chuan lehkhabu thlir lawkna a nei. Lehkhabu ziaktu Lalnunmawii’n lehkhabu a ziah dan tlangpui a sawi.