CM-in motor a valiam

Vawiin (18.6.2026) hian Mizoram Police Headquarters (PHQ) in Assistance to State & UTs for Modernisation of Police Scheme atanga lei lirthei chi hrang hrang 219 an lei chu 3rd Battalion MAP Parade Ground, Mualpuiah atangin Chief Minister Lalduhoma’n a vai liam a, Home Minister K Sapdanga pawhin a telpui.

Lirtheite hi an la rawn thleng kim lo deuh a, an thlen kim hunah chuan a vaiin 219 an ni ang. Mizorama Police Station zawng zawng (P/S 44) ten a thar pakhat tal an dawng vek dawn a, chu mi zarah chuan Police Outpost 15 pawhin lirthei an kawl theih phah dawn a ni. Battalion te, Specialised Unit te leh Police Training School-te pawhin an dawng bawk ang.

Chief Minister chuan, Central Sorkar Scheme, Assistance to State & UTs for Modernisation of Police, (ASUMP) atanga an fund hmuh zawng zawng chu state share-te nen cheng vbc. 44.53 a nih thu sawiin, “Heng zinga cheng vbc. 30.45 hi lirthei lei nan bik hman a ni a, a dang hi police thuam chakna hmanraw thar chi hrang hrang lei nana hman a ni,” a ti.

Home Minister K Sapdanga pawhin thu sawiin, “Mizoram Police-te thawhrimnaah ka lawm takzet. Lirthei tharin an nitin hnaah awlsamna tam tak a thlen ka beisei. Kan police-te thuam chak hi kan ram himna thuam chakna leh khawtlang nuam neihna a ni tih kan hria,” tiin police-te chu thuam chak zel an tum thu a sawi.