CM-in project leh workshop a hawng

Vawiin (2.6.2026) chhun khan Chief Minister Lalduhoma chuan Youth Recreation Hall (YRC), Falkland-ah Mizo Ginger USP Mission Projecte, Price Support Scheme for Arhar Dal, Chhawhchhi leh Nihawi te bakah NCEL Ginger Export Awareness Workshop a hawng.

Chief Minister chuan chuan thu sawiin, “Kan lo sawi tawh thin angin thlai thar leina budget-ah kan dah. Sawhthing hi kan lei tam ber leh lian ber a ni a, a thar pawh kan thar tam. Mizoram sawhthing hi a tè deuh nain a quality a lo tha bik hle a, damdawia hmantlak (pharma grade) a lo tling. A pulunga kan hralh ringawt hian a tlawmin a hlawk tawk lo va, sawngbawl hnu ngeia hralh hi a hlawk. Tin, a chinna lamah tuna kan kal dan ang renga kan kal chuan kan leilungin a chhiatpui dawn si. Dinhmun duhawm zawka kan din theih nan vawiinah hma thar kan la ta a ni,” a ti.

Ministry of DoNER kaltlangin sawhthing hi Unique Selling Proposition-ah an puang tih sawiin Lalduhoma chuan, “Sustainable Cultivation & Post Harvest Management Project kan siam. DoNER hian phur takin hma min lakpui a, DoNER Minister Jyotiradytia Scindia chungah kan lawm hle. A chinna lama hmalakna (sustainable cultivation) hi chu ministry hrang hrangte nena thawkhoa kalpui tur a ni,” tiin Post Harvest Management atan bik hian DoNER hian cheng vbc. 30.13 an rawn pek thu a sawi.

Chief Minister chuan sawhthing thar tam ber district, Champhai District-ah pilot angin processing unit changtlung tak pali din an tum tih sawiin, “Vawiinah kan lo hawng ta a ni. He project hi sawhthing chingtu chhungkaw 20,000 in an chhawr tangkai turah kan ngai a, a process-na lamah hna thar 100 vel a siam bawk ang. Champhai district hi kan hlawhtlin phawt chuan district danga kalpui zelna tur sum pawh DoNER hian min pek an inhuam a ni,” a ti.

Kan sawhthingte khawvel huapa thehlar an tum dawn tih sawiin Chief Minister chuan, “A quality that bikna te, GI Tag a nih tawhnate behchhanin sawhthing oil leh thildang hlu tak tak siamchhuah kan tum bawk. India ram leh khawvel ram danga a thawnchhuah dan inzirtirna kalpui tan a tul tih kan hria. Chutiang min zirtir tur chuan National Co-operative Exports Limited tluka tha an awm chuang lo. Vawiinah anni hi chah chhuakin Sawhthing export dan tur kan zirho dawn,” tiin kan sawhthing hmun leh global market thlunzawm an tum tan dawn thu a sawi.

Sorkar laipui hian kumin atan PM – AASHA hnuaiah Price Support Scheme a rawn siam a, Mizorama kan thlai chin arhar dal, nihawichi leh chhawhchhi chu kalpui ve tur a ni. Kumin tharchhuah atanga kalpui ve nghal tur a ni. Arhar dal hi minimum support price kg khat Rs. 84.50 a ni ang a, nihawi hi kg khat Rs. 83.43 niin, chhawhchhi hi kg khat Rs. 103.46 a ni ang. National Agricultural Cooperative Marketing Federation of India in Mizoram tharchhuahte hi a leisak ang a, Mizoram Agricultural Marketing Board nen an thawkho ang a, collection centre an rawn siam dawn a ni.

He minimum support price aia sanga hralhna hriate chuan an hralh zel thei a, support price scheme hi inphuartir loh tur a ni. He scheme kaltlanga hralhte chu direct benefit transfer hmangin an account-ah pawisa thun zel a ni ang a, middleman an awm dawn lo.