News

Vawiin (16.5.2026) hian Chief Minister Lalduhoma chuan Samthang Community Hall-ah khawtlang mipuite buatsaih Sawhthing Kut a hmanpui a, “Sawhthing hi kan ram leilung tichhe tam lo zawng leh a hralhna lama kan lo hlawkpui zawk theih nan organic kan uar a tul. A processing kan kalpui pawh tul,” tiin an inbuatsaih chho zel thu a sawi.

Chief Minister chuan, a politics zin kawng leh sawhthing market-in inanna tak a neih thu sawiin, “Kawng a bum boh. Mah se, Pathian hun ruat lo thleng hi tuma dan rual a ni lo. Nikumah inzir chawpin hma kan la a, harsatna tam tak kan tawk nain kan pek chhuah tur support price zawng zawng kan pe chhuak thei. Kuminah pawh a tir lamah a rate hi a tha mai lo. Kan huntiam thlen hmaa a rate hniama lo hralh ta mai khua an lo awm bawk. Nimahsela, Pathian zarah kan tum ang ngeiin kan hun tiam atangin kan lei tan leh a ni. Tunah phei chuan kan beisei phak bakin sawhthing rate a rawn sang ta. Hei hi kan tih a ni lo va engkim chunga roreltu Pathian hnathawh a ni tih kan hria a ni,” a ti.

Mizoram sawhthing hi a quality a tha a, damdawi anga hman theih a ni tih sawiin Lalduhoma chuan, “Essential oil a ngah a, fibre a nei tlem si a, Ministry of DoNER-ah Unique Selling Proposition (USP) min kalpui turin kan dil a, min rawn phalsak ta. USP – Sustainable Cultivation & Value Chain Management Project kan siam a. project cost hi cheng vbc. 190 vel a ni. A processing unit dinna tur bik atan cheng vbc. 30.13 kan ruahman. Tun Nilaini liam ta khan a project hawnna hi online-in DoNER Minister nen kan nei a, a hawnna programme kan hman zawh rual hian processing unit kan dinna tur bik sum cheng vbc. 30.13 hi an rawn sanction nghal a ni,” tiin hetiang taka pawisa sanction rang hi sawi tur a van thu a sawi.

Samthangah hian chhungkua 230 vel a cheng mek a, a tam zawk hian lo neiin ei an zawng a, sawhthing bakah fur zikhlum an ching nasa a ni.