CM-in Siaha DC Office building a hawng

Vawiin (20.8.2026) chhun khan Chief Minister Lalduhoma chuan DC Office Complex, Siaha-ah DC Office building thar chu a hawng a, Palak Bialtu MLA K Hrahmo leh sorkar official-te an tel.

Mizoram Sawrkar chuan thang that lak a tum ringawt lo tih sawiin Chief Minister chuan, “Ram hmasawnna leh rohlu a ngai pawimawh,” a ti a, hmalaknate tha taka thawk zel turin department tin a chah a, chung hnate chu tha taka thawh a nih theih nan khaw tina tlawmngai pawl leh VC-te chu enzui kawnga thawhpui turin a sawm nghal.

Chief Minister chuan district-a sawrkar office pawimawh ber zinga mi DC Office building tha tak a hawng thei chu lawmawm a tih thu sawiin, “Hei hi Siaha district tan mai ni lo, Mizoram tan pawh hmasawnna chhinchhiah tlak tak a ni,” tiin hmun tha laili a DC Office a din theih nana zangnadawmna beisei hauh loa, mahni in leh lo sorkar hnena petute chungah lawmthu a sawi

Lalduhoma chuan Mizoramin a hranpa-a Finance Commission a neih hnuah state sawrkar bakah ADC-te leh local bodies hrang hrangte sum dawn tur chu an ruahmanna angin an kal thin, “An ruahman dan bakin kal theih a ni lo. Tuna MADC-te sum indaih lohna pawi ka ti hle. An harsatna zualpui phurh ruksak nan One Time Grant pek kan tum,” a ti.

Siaha DC Office building hi NEDP atanga sak a ni. Work order amount chu Rs. 5,09,08,023/- a ni a, October 1, 2018 khan sak tan niin December 1, 2025 khan zawh fel a ni. Ground floor ah room 17 leh first floor-ah room 12 a awm a, a vaiin room 29 a awm a ni.