News

MNF Legal Board hruaitute chuan vawiin (25.10.2025) hian Aizawl Press Club-ah press conference koin, YMA Inkhawmpui Lian neih zawh taka dawt sawiah Chief Minister Lalduhoma an puh.

MNF Legal Board Vice Chairman Lalpianfela Chawngthu chuan Chief Minister hian politics rawngkai lo, Mizote tana hlu em em YMA member thalaite punkhawmna leh zel pawh dawt hmanga campaign-na hmuna atana a hmang duh nia sawiin, ‘Pawi kan ti a, zahpuiawm hlein kan hria. A Minister leh MLA-te ngei pawhin a thatna an sawipui thawm hriattur awm miah lo, amah ngei pawhin dan sakei tia a lo sawi thin, FCAA 2023 Mizorama hman ve a duh leh tak thut chhan sawifiah tumna atan YMA Inkhawmpui Lian hi Chief Minister hian a hmang duh tlat mai,’ a ti.

Lalpianfela Chawngthu chuan CM hian Central Sorkarin ram venhimna changchawia Mizoram chhung, a duhlai apianga hma a lak theihna tur chin, ramdang nena inrina atanga boruaka teha km 100 chin tih FCAA 2023-a tarlan chu km 10 chin chauh angin a sawi tih sawiin, ‘Hetianga dawt chiang tak thalai sang rual pungkhawmte hmaa a sawi duh mai hi a zahthlak hle. Hei mai hi duh tawk lovin, Central Sorkarin sipaite bu khuarna tura ram hectare 10 chin, forest clearance buaipui ngai loa rawn luah theihna tur pawh Left Wing Extremist-te awmna state chauh huam tur ang leh Mizoram huam ve lo angin dawt chiang tak a sawi bawk,’ tiin Left Wing Extremist-te awmna state-a sipaite hmun khuar theihna tur hi chu a hranga tarlan niin, hectare 5 aia zau loah tih a ni zawk thu a sawi.

Heng dawt ngialngan hmanga insawifiah a tumna hi duhtawk loin, November 29, 2023-a guidelines lo chhuakah ram venhimna chungchawia Central Sorkarin hma a lakna turahte state sorkarah dil phawt tur a ni, state thuneihna a sang ta a ni tiin dawt bawk a sawi zawm leh tih sawiin MNF Legal Board Vice Chairman chuan, ‘Guidelines-ah hian state sorkarah dil tur tih reng reng a awm lo a, thuneihna tawp chu Central Sorkar kutah zel dah a ni. Guidelines Para 28 ah chuan Central Sorkarin a tul ang zelin, state sorkarte hnenah hmalak dan tur a hriattir ang tih tarlan a ni a, FCAA 2023 Rules a ni emaw, guidelines a ni emaw, thuneihna tawp chu Central Sorkar kutah vek a awm a ni,’ a ti.

MNF Legal Board Vice Chairman chuan, ‘FCAA duh lotute hmasawnna(develoment) duh ve hial anga inpuhna lek lek a awm mek a. FCAA Mizoramin kan pawm (adopt) hma hian tuna kan ram hmsawnna kan hmuh zawng zawng hi thawh a lo ni tawh a ni tih kan han sawi nawn leh duh,’ tiin kan ram leh hnam himna hralh kher lo pawh hian hmsawnna hna a thawh theih a ni tih hi lo hre nawn leh turin Zoram mipuite an chah nawn thu a sawi.

C Lalpianfela chuan, ‘Hetiang ang dan tha lo tak mai. CM chauhin a sawimawi, a Minister-te leh MLA te bakah ZPM Party ngei pawhin a thatna sawi tur an hriat miah loh dodalna atana MNF-in October 29, 2025 a total bandh a huaihawt tur hi Zoram mipui zawng zawngten kan ram leh hnam tan a ni tih hria a, min thlawpa min tawiawm theuh turin kan sawm che u a ni. Chutihrualin, kan sawrkar pawhin total bandh neih hma hun tlemte la awmah hian he dan Assembly in a lo pawm tawhna official resolution hnuhkir a nih leh theihnana Special Assembly kohna tichhuak turin kan han ngen nawn leh bawk a ni,’ a ti.