News

Vawiin (15.5.2026) hian Chief Minister Lalduhoma chuan Khawzawl Vengthar YMA Hall-ah Khawzawl Sub Headquarters YMA Conference vawi 2-na chu khuallian niin a hmanpui a, YMA member-te chu khawtlang leh ram nuam siam tura thawhpuiah a sawm.

Chief Minister chuan, “Mizoten YMA kan nei hi kan nihlawh hle a, YMA anga mi zawng zawng huikhawm a, khawtlang thuiphui thei pawl hi ram dangah an awm ka ring lo hial. Chuvangin, YMA hi kan tan ram rotling a ni Kan thalai tam takten ruihhlo an ngaih avangin YMA hian kumpuanah ‘Ruihhlo Do’ a hmang mek a, sorkar pawhin ruihhlo hi kan do nasa a, a ngawlveite chhanchhuahna pawh kan kalpui a. Kan hmalakna tinrenga kan kutke pawimawh ber chu YMA in ni deuh zel. In chungah kan lawm hle,” a ti.

YMA chu Zo nun ze mawi tinrengte chhawm nunga, thangtharte hnena zirtirtu a nih thu sawiin Lalduhoma chuan, “Tun hnaiah Mizoramin khualzin kan ngah hle a, min rawn tlawhtuten min fak fona pakhat chu kan Zo nun ze mawi tak tak an rawn hmuhte hi a ni. Nghahloh Dawr ringawt pawh hian an thinlungah thu a sawi nasa em em thin. Tunah chuan Zo nun ze mawi hi khualzinte hip thei khawpa mihring nun mawi a ni tan ta a. Ka zain i uar deuh deuh ang u,” tiin YMA member-te pawh lo tang sauh sauh turin a sawm.

Vawiin vantlang inkhawm hi Vanlalsawma Colney, Vice President, Sub Hqr. YMA in a kaihruai a, TProf. Malsawmliana, General Secretary, CYMA chuan YMA kumpuan “Ruihhlo Do” tih hmangin thu a sawi. “Rualtin khumtu YMA” tih hla leh hla dang tam tak phuahtu V. Thangzama, nizana thi ta sunna hun an hmang bawk.

Khawzawl Sub Hqr huam chhungah hian Group YMA pali, branch 42 an awm a, member 19,899 an awm mek a ni.