News

MNF Legal Board hruaitute chuan vawiin (6.11.2025) hian Aizawl Press Club-ah press conference neiin, Chief Minister Lalduhoma’n Election Model Code of Conduct a bawhchhiat avangin Jt. CEO-ah complaint an thehluh thu leh CM hian thiam loh a chan chuan kum 3 chhung jail-ah a tan theih thu an sawi.

Ni 1.11.2025 khan Silsury-ah Chief Minister hian ‘Kan hruaitu hmasaten Mizo mipuite leh Chakma inkarah inhuatna chi an lo tuh a, hruaitu hmasate’n Chakma huat dan min lo zirtir tawh thin a ni’ tia a sawi thu sawiin MNF Legal Board hruaitute chuan, ‘CM hmasa Pu Zoramthanga thusawi niawm takte tarlangin, Chakma-te fuipawrh tumin thu mak tak tak a sawi chhunzawm. Kan hruaitu lu berin dan dinglai MCC hre reng chunga by-election neih tura chak duh luat vanga hnam tlem zawk Chakma-te hnena a chipui Mizote leh ram hruaitu hmasate a chhe thei ang bera a zuk hek duh mai hi a pawi kan tiin demawm kan ti takzet a ni,’ a ti.

MNF Legal Board hruaitute Chief Minister thusawi chu MCC leh Representation of the People Act, 1951 hnuaia section 125 bawhchhiatna, criminal offence a nih thu sawiin, ‘Kum thum thleng lung in tantir leh pawisa chawitir hrem theih a ni. RP Act 1951, section 123 (3-A) in corrupt practises tiin a tarlang tel. Hetiang taka dan pawisa lo hi CM ni zel tlakah kan ngai lo,’ tiin CM hian MCC kalhin mipuite chu an party candidate an vote loh chuan sorkar atanga hamthatna an hmuh turahte hrekahte a vau bakah hamthatna chi hrang hrangte tiamin Silsury kawng siamna tur cheng vbc. 100.40 dah fel a nih tawh thute a sawi tih an tarlang.