News

New Delhi-a châm mek Chief Minister Lalduhoma chu vawiin (4.5.2026) hian Niti Ayog Member kal chhuak tur Dr VK Paul chuan Mizoram House, Chanakyapuri, New Delhi-ah a kawm a, Mizoram hmasawnna tur kawng hrang hrang an sawi dun.

Dr VK Paul chuan a hun chhungin Mizoram Sorkar nen ṭha taka an thawh dun avangin lawmthu a sawi a, Chief Minister Lalduhoma hmalakna hrang hrang a fak bakah Niti Ayog nen thawhona ṭha tak an nei thei thu lawmawm a tih thu a sawi.

Chief Minister chuan Niti Ayog-in Mizoram a duhsaknaa lawmthu sawiin sawhthing chungchanga hmalakna an neihte chu Mizoramin a chhawr mek thu a sawi a, “Ginger Capital of India-ah min puang khan rah ṭha a chhuah chho zel a ni,” a ti a, Mizoram state hmasawnna hrang hrangte a sawi.

Lalduhoma chuan Mizoram chu ziak leh chhiar thiam kimna state hmasa ber a nih thu te, eirukna leh hlemhletna laka state finlhlim ber a nih thu te, khualzin hip kawnga hmasawn nasa tak a nih thute leh India rama state ralmuang ber a nih mek thu sawiin, “Tun hnaiah silai keng pawl awm chhunte pawh remna kan siampui leh tawh a ni,” a ti.

Dr VK Paul chuan Mizoram chu state ralmuang a nih thu state dangte pawhin an hriatpui thu a sawi.

Chief Minister hoa inkawmnaah hian Tourism Minister Lalnghinglova Hmar pawh telin, Niti Ayog leh Mizoram Sorkarin Tourism Conclave an buatsaih dun tur chungchanga hmalaknate an thlir a, May thla chawhnu lamah Delhi-ah pre-conclave meeting neih dan turte an sawi bakah Tourism Conclave-a Niti Ayog hmalaknate official lamin an hrialhfiah a ni.

Niti Ayog lam hian Mizoram puala tourism policy changtlung zawk duan dan turte, Mizoram puala Institute of Hotel Management-Ashok (IHM-A) hnuaia a thlawna training neih theih dante leh investor koh luh chungchangte Chief Minister leh Tourism Minister hi an sawipui bawk a ni.