CM leh Railway Minister an inkawm

Delhi-a cham mek Chief Minister Lalduhoma leh Union Railway Minister Ashwini Vaishnaw chu vawiin (24.11.2025) chawhma khan Railway Bhawan-ah an inkawm a, thil chi hrang hrang an sawi dun. A hnuaia tarlante hi an sawiho leh relte chu a ni.

SAIRANG TO THENZAWL REL STATION :

Thenzawl Peace City Master Plan siam mek a nih avangin Sairang to Thenzawl Railway alignment chu peihfel vat a tul thu Chief Minister hian Railway Minister hi a hrilh. Railway Minister hian February, 2026 ral hma ngeia peihfel an lo tum tur thu a sawi a ni.

SAIRANG TO GUWAHATI REL KAL HUN :

Sairang atanga Guwahati thleng rel kal mek chu passenger-te awlsam zawkna turin Guwahati hi zing dar 4:30 a thleng thla hman tura a kal hun siamrem Chief Minister hian a rawt a, Railway Minister rawtna hi a lo pawm a ni.

SAIRANG TO DELHI RAJ DHANI EXPRESS :

Sairang to Delhi Rajdhani Express tuna tlan mek hian Delhi thleng thla turin darkar 42 leh minute 20 a mamawh a, hemi chungchangah hian Chief Minister chuan, kawng tawi zawk zawh tir turin rawtna a thlen. Hei hi Railway Minister chuan lo pawmsakin, kawng tawi leh rang zawk zawhtir a nih tur thu a lo hrilh a, he kawng tharah hi chuan darkar 4 velin rel hi a thleng hma tawh dawn a ni.

Chief Minister hian Sairang to Delhi Rajdhani Express chu khualzin an tam avangin kar khata vawi hnih tal tlantir turin rawtna a thlen bawk a, hei hi Railway Minister chuan lo pawmin, bawhzui nghal a nih tur thu a hrilh a ni.

KOLKATA TO SAIRANG REL CHUNGCHANG :

Kolkata to Sairang rel, Sairang Station-a zan dar 7:45 a thleng thin chu khualzinte tana awlsam zawk turin tlai dar 3:00 a thleng tura siamrem rawtna Chief Minister hian a thlen. Railway Minister hian a lo pawm a ni.

SILCHAR TO BAIRABI REL FLAG OFF CHUNGCHANG :

Chief Minister chuan Silchar to Bairabi khualzin phur rel, Sairang thlenga extend tur chu tlan tir (flag off) thuai turin Railway Minister hi a ngen a, Railway Minister chu a hmun ngei atanga flag off turin a sawm nghal. Railway Minister chuan hun remchang a lo zawn tur thu a lo hrilh.

MIZORAM ILP PORTAL AWMSA IRCTC TRAIN TICKET PORTAL-A DAHLUH :

ILP tha taka kenkawh a nih theih nan leh hnam dang khualzinte awlsam zawk nan Mizoram ILP Portal chu IRCTC Train Ticket Portal-a dahluh ve ni se, ti. Chief Minister rawtna chu Railway Minister chuan IRCTC hotute a lo zirchian tir tur thu a lo hrilh a ni.

WAREHOUSE/COLD STORAGE CHUNGCHANG :

Adviser to Chief Minister hnen atanga Railway Station ramchhunga thlai thar thawnchhuah tur dah lailawkna tur Warehouse/Cold Storage din ni se, ti a rawtna chu Railway Minister chuan an lo bawhzui tur thu a sawi. Mizoram Sawrkar chu Warehouse dinna tur hmun remchang lo ngaihtuah turin a ngen nghal a, thil tul dangte chu Raiway Ministry-in a ngaihtuah zui theih tur thu a hrilh a ni.