CM leh Union HM an inkawm

Official thila New Delhi-a cham mek Chief Minister Lalduhoma chuan nimin (12.06.2026) khan Union Home Minister Amit Shah chu a pisa Kartavya Bhawan ah a hmu a, Mizoram hmasawnna tur thil pawimawh tak tak a sawipui.

Chief Minister hian Security Related Expenditure (SRE) Scheme hnuaia hmarchhak bialten tanpuina an dawn thinah Mizoram chu hel awm lohna, state ralmuang a nih avangin pek a ni ve lo tih sawiin, drugs tawlhrukna leh cyber crime dona kawnga sorkar tha tih chak nan SRE hnuaiah hian sum (funding) pe ve turin a ngen. Home Minister chuan hmarchhak bial hmasawnna tura ruahman bik PM-DeVINE (Prime Minister’s Development Initiative for North Eastern Region) Scheme atanga project thehlut zawk turin a lo rawn a, a lo bawhzui sak tur thu pawh CM hi a hrilh a ni.

Chief Minister chuan Manipur, Bangladesh leh Myanmar atanga raltlan mi 40,000 dawn Mizoram an awm mek thu te, state sawrkarin heng mite chhawmdawlna tur hian theihtawp a chhuah zel thute sawiin. “Sawrkar Laipui tanpuina kan mamawh hle a ni,” a ti. Amit Shah chuan raltlante chhawmdawlna atan hian Mizoram Sawrkar hnenah cheng vaibelchhe 10 man hu buhfai pek a nih tur thu a lo hrilh a ni.