CM thusawi kan ngai serious &#8211; Tawnluia

MNF chuan vawiin (4.8.2026) hian an office-ah chhung inkhawm an hmang a, thusawitu MNF NCC Member Tawnluia, Ex. Dy. CM chuan remna thuthlung chungchanga Chief Minister Lalduhoma thusawi an ngaih serious thu leh PAHOSS-ah eirukna pakhatmah a awm loh thu a sawi.

Tawnluia chuan India leh Mizo mipuiten remna thuthlung an siam tih sawiin, “Hei hi India Constitution ah ziah luh a ni a; MNF leh Central Home Department inremna anga sawi awm hi kan la serious hle. Remna thuthlung chungchangah kar kalta khan kan Chief Minister chuan Mizoram Law College a thu a sawiah, remna thuthlung chungchangah thil mak a sawi a, pawi kan ti. India sorkar aiawhin Home Secretary Pu R.D Pradhan leh Mizoram UT chief Secretary Pu Lalkhama ten hming an ziak a ni a; an signature pawh hmuh theih vek a ni,” a ti.

Kan CM-in MNF leh India Sorkar inremna (accord) anga a sawi chu thu dik lo a nih thu sawiin Ex. Dy. CM chuan, “He thil hi kan la serious riau a, Remna kha Mizoram mipuite siam a ni. India Constitution Article 371 (G) a thun turin inremna thuthlungah khan ziah a ni a, Constitution ah sengluh niin, MNF te chauh khan ziak ni ila engtin nge kan hman theih ang. Mipui leh remna thuthlung ziah kha kan Chief Minister hian a tibawrhbang a ni,” tiin CM thusawi chungchang hi naktukah MNF Party hruaituten bawhzui tura meeting an ko lawmawm a tih thu a sawi.

Tawnluia chuan ILP chungchang sawiin, “Remna thuthlung a ziah a nih angin, keini chuan thlahdul kan phal ngai dawn lo. Kan Chief Minister erawh chuan Central Sorkar thuneihna a ni tiin a tlanchhe nghal dui mai a, keini chuan state sorkar min rawn a ngaih dawn avangin kan phal ngai dawn lo a ni,” a ti.

PAHOSS chungchang sawi bawkin Tawnluia chuan, “February 6, 2009 ah kan din a, lirthei 423 dah theihna cheng nuai 159 sengin kan sa. PAHOSS atan cheng nuai 7,002 budget-ah nuai 6,139 sanction a ni a, nuai 1,152 kan hmang. Covid avangin chet theih a ni ta loa; nuai 4,900 kan hman bang chu K. Deposit-ah dah a ni. PAHOSS-ah eirukna pakhat mah a awm loa, court-ah thiam lohna tur kan nei lo,” tiin an fihlim thu a sawi.