News

Chief Minister Office (CMO) chuan Chief Minister Lalduhoma’n tun hnaia Sainik School, Chhingchhipa jet fighter dah a sawi chungchang social media-a darh an sawifiah.

CMO sawifiahna (a ngai ngaiin)

Chief Minister Pu (@lalduhoma.cm) Lalduhoman kumin January ni 14 a Armed Forces Veteran Day cum Ex-Services Reunion of Mizoram, Gajraj Hall, Aizawla thu a sawi, minute 17:45 naa “Jet Fighter la hman loh” tia a sawi kha “Jet Fighter hman tawh loh” tih zawk tur a ni a. Sainik School Compound-a Jet Fighter hman tawh loh dah tum chungchang hi Sainik School hotute hnen atanga a dawn a ni.

A hmain Chief Minister hian Chhingchhip Sainik School hi a tlawh a, school hotute nena an inkawmnaah; naupangten an zirna leh an kal zelna tura phurna leh tumruhna nasa zawk an neih theih nan Jet Fighter tak tak, hman tawh si loh an school compound hmun remchanga dah an tum thu hi an lo hrilh a. An school-ah Mizo naupang tam zawk an luh theih nan Chief Minister hi awareness neihpui turin an lo ngen bawk a. An ngen ang hian Chief Minister pawh hian 7th October 2025 khan a Youtube Channel-ah sawmna (message) a tichhuak a ni.

Gajraj Hall-ah hian Ex Services-te hmaa thusawi a nih angin, an fate chu Sainik School-a luhtir turin a sawm a. Sainik School hotute hrilh an Compound-a Jet Fighter hman tawh loh dah an tum thu a sawi chhuahnaah, “Jet Fighter, hman tawh loh” tia sawi tur kha “Jet Fighter, la hman loh” tiin a sawi palh ta a ni.

A hmuna ngaithlatute pawhin a sawi tum tak kha an hrethiam em em a. Nimahsela, tun hnuah mi thenkhatten he lai clip hi la thlaa an thehdarh tak avangin a sawifiahna kan rawn siam a ni e.