Committed liabilites pumpelh kan tum

Vawiin (24.2.2026) Assembly Session-ah Finance enkawl Chief Minister Lalduhoma chuan ba siam chawp (committed liabilities) chu tun sorkar chuan pumpelh an tum thu a sawi.

MNF member Robert Romawia Royte zawhna chu amah a awm loh avangin Leader of Opposition Lalchhandama Ralte-in a zawh sak a ni. Rober Romawia zawhna chu, “Tunhnai ni 12.1.2026 mai khan Chief Minister leh Finance Minister ni bawkin sorkar lo awm leh tur leiba hnutchhiah kan tumve lo tiin a sawi. He sorkar hian sum puk a uar hle chung hian leiba nei loin engtin nge insiam a tum?” tih a ni.

Chief Minister chuan, “Sorkarin leiba a hnutchhiah tum lo tih hi chu sum puk leiba (borrowing rulh bang outstanding debt) sawina a ni loa, kan hnunga mite rulh tura thil lo lei bat emaw, sum awm si loa hna inthawhtir ve ringawt avanga ba siam chawp (committed liabilities) sawina a ni. Heng leiba (committed liabilities) siamtu tam tak chu budget provision awm si loa, supply order issue leh work order pekte a ni ber. Hengte hi tun sorkar chuan pumpelh a tum a ni,” a ti.

Lalduhoma sawi danin, kum 2018 atang committed liabilities tlingkhawm PWD-ah cheng uai 1,287, PHE-ah cheng nuai 4,842 leh Power & Electricity Department-ah cheng nuai 182 rulh tawh a ni. Rulh loh PWD-ah cheng nuai 583, PHE-ah cheng nuai 5,801 leh P&E ah cheng nuai 1,262 a la awm.