Contractor-te’n an khinna court-in a hnawl

July 31, 2026 khan Gauhati High Court, Aizawl Bench chuan Special Assistance to States for Capital Investment (SASCI) Scheme, 2023-2024 hnuaia, Mizoram Sorkarin contractor-te hnathawh tur hlut zawng a tihhniam avanga, contractor-te’n sorkar an khinna chu a hnawl.

Contractor-te hian Finance Department office memorandum dated 15th February 2024 leh Public Works Department order dated 27th March 2024-a an hnathawh tur hlutna tihniam tura thutlukna an siam chu an khing a ni. Sorkar thutlukna hian an dikna chanvo a bawhchhia niin an sawi.

Amaherawhchu, High Court hian sorkar thutlukna hi sum harsatna leh inthlanpui avanga hna a khawmuan tak vang zawk niin a hmu. Court chuan hemi chungchangah hian inrawlhna tur awmin a hmu loa, an contract hna thawh tur zat atana an agreement hmasa chu keng tlang loin, petition-te chu hnawl.

Contractor-te chu arbitration emaw civil court emaw a kal turin zalenna a pe.

Heng contractor-te hnathawh tur hi Sorkar Laipui pawmpui hmasak vek tawh niin, contractor-te hi September 2023-a restricted tender chhuaha thlan an ni. Letters of acceptance an hmuh hnuah performance security-te dahin, PWD nen inremna an ziak fel a, hna tan tura hriattir nghal an ni.

Mah se, hna an thawh tan tak tak hmain Mizoram Inthlanpui Model Code of Conduct hman nghal a ni a, a hnuah state sorkar chuan Sorkar Laipui atanga sum lo thleng tur ruahman zat aia tlem an hmu a, a bak lo thleng leh tur te pawh an hmu tawh lo ang tih an hlauthawn avangin leh sum lama harsatna a awm tak avang hian, sorkar chuan hnate chu tihtlem a, a pawimawh zualte chauh thawk turin thutlukna a siam ta a ni.

Source : www.jclalnunsanga.in