Corporator-in sum ngaihtuah sak

AMC Ward-VIII Corporator Christina Roluahpuii Sailo chuan an ward chhunga vawk vulha eizawng duh tak tak, dan in a phal china vulhna tur hmun neite tan Central Scheme – North East Region Community Resource Management Society (NERCORMS hnuaiah chhungkaw 18 tan, cheng nuai 40 a hmuh chhuah sak tawh.

Construction of Pig Breeding Unit (Piggery) ah hian chhungkaw pakhat tan vawk-in panga zel sak tur a ni a, chhungkaw thlanchhuahte hian an sa mek a, sa zo tawh te pawh an awm. Vawk in hi an sak zawhah water tank & connection, electrification leh feeder siamna tur (lumpsum) pek an ni anga, vawk note (piglet) leh vawk chaw (pig feed) an dawng tel leh bawk dawn.

Christina-i chuan, “Mizote hian vawksa kan ngainat em avangin vawk vulh in khap sak bur hi thil harsa tak a ni a, tunah pawh hian kan duh khawp lei tur kan hmu lo fo zel a, kan in chan meuh thin lo. Chuvangin, mipuiten vawk thianghlim tak leh hnawksak si lo a vulh kan tum chhoh zel hi a tul hle a, vawk vulh hi eizawnna tling a ni,” tiin, hetiang ang central scheme hi a bialchhung mite tan a ngaihtuah sak zel tur thu a sawi.