News

Nizan (1.1.2026) khan Council of Ministers chu Chief Minister Lalduhoma kaihhruaiin Chief Minister Office Cabinet room-ah an thukhawm a, Chakma Autonomous District Council (CADC) chungchanga Governor-in Council of Ministers thurawn (advice) hriat a duh chungchang an sawiho.

Governor hian CADC kal dan chhui chiangtu tur Inquiry Commission thar din tha an tih leh tih loh thuah Council of Ministers ngaihdan hriat a duh a ni.

Sorkar thuchhuah tarlan danin, CADC kalphung chhui chiangtu Inquiry Commission hi din a lo ni tawh a, an report pawh an thehlut tawh. Chu mi hnuah Autonomous District Councils pathumte kalphung zirchiangtu Study Team, Chief Secretary kaihhruaina hnuaiah din a ni leh a, an report an thehlut tawh. Lawngtlai Deputy Commissioner pawhin CADC chungchang report a thehlut tawh bawk a ni. Heng report pathumte hi an tha tawk a, hranpaa Inquiry Commission din tharleh hi a tul tawh loah Council of Minister chuan an ngai a ni.

Governor hian CADC chu Governor’s Rule a dah chhunzawm zel tur chi a nih leh nih loh thuah pawh Council of Ministers ngaihdan (advice) hriat a duh a ni. Council of Ministers chuan, CADC-ah hian MDC member 20 a member 16 neia sorkarna siam thei party an awm avang leh High Court-in sorkarna siamtir dan kawng zawng tura thurawn a lo pek tawh angin Governor’s Rule-a dah loa sorkarna siamtir turin ngenna a lo siam tawh a ni. Nimahsela Governor’s Rule-ah hian dah a ni ta tho.

He Governor’s Rule term a zawh hnuah pawh hian sorkarna siam thei party-te hian an dinhmun sawh sawn loa sorkarna an la siam theih reng avangin Governor’s Rule-a thla ruk dang dah leh a tulna chhan (political instability) engmah a awmin Council of Minister chuan hre loa, sorkar ngelnghet tak a ding thei tih chu an ngaihdan a ni.